संजय गडदे, मुंबई

मागील काही दिवसांपासून वातावरणातील बदलांमुळे मुंबईतील हवेची गुणवत्ता घसरल्याच्या तक्रारी वाढल्या आहेत. या वाढत्या चिंतेच्या पार्श्वभूमीवर महाराष्ट्र प्रदूषण नियंत्रण मंडळाचे अध्यक्ष सिद्धेश कदम यांनी मालाड येथील सतत हवा गुणवत्ता मापन केंद्राला भेट देऊन स्थितीची पाहणी केली.

या भेटीदरम्यान कदम म्हणाले, “आज अध्यक्ष म्हणून आलो आहेच, पण मुंबईकर म्हणूनही हे मॉनिटरिंग स्टेशन योग्य प्रकारे कॅलिब्रेट झाले आहे का, याची खात्री करण्यासाठी आम्ही स्वतः जमिनीवर उतरलो आहोत.” काही दिवसांत मुंबईची हवा धोकादायक पातळीवर गेल्याचे चित्र माध्यमांमधून सादर झाले असले तरी, वस्तुस्थिती तशी नाही,” असे त्यांनी स्पष्ट केले.

माध्यमांना विनंती करताना त्यांनी सांगितले, “जनतेपर्यंत पोहोचणारी माहिती पडताळूनच द्या. चिंताजनक परिस्थिती घडलेली नाही आणि घडू देणारही नाही. एमपीसीबी आणि महानगरपालिका मुंबईकरांचा श्वास कोंडू देणार नाहीत.” महानगरपालिका क्षेत्रातील बांधकामकामी कारवाईबाबत त्यांनी माहिती दिली की, या भागात 176 बांधकामे सुरू असून 81 नोटिसा देण्यात आल्या आहेत, तर 17 कामांना स्थगिती देण्यात आल्याचं त्यांनी सांगितलं.

तसेच नियमांचे उल्लंघन करणार्‍यांना कोणतीही सूट नसून, “एमएमआरडीए, मेट्रो किंवा बुलेट ट्रेनसारख्या प्रकल्पांनाही नोटिसा देण्यात आल्या आहेत,” असे त्यांनी स्पष्ट केले. कदम यांनी विश्वास व्यक्त केला की सर्वांच्या सहकार्यातून हवेची गुणवत्ता सूचकांक (AQI) मुंबईकरांना त्रास देईल अशा पातळीपर्यंत जाऊ दिला जाणार नाही, असेही ते म्हणाले.