संजय गडदे, साम टीव्ही

पावसाळ्याच्या तोंडावर म्हाडाच्या मुंबई इमारत दुरुस्ती आणि पुनर्रचना मंडळाने मुंबई शहर बेटावरील उपकरप्राप्त जुन्या आणि मोडकळीस आलेल्या इमारतींचे सर्वेक्षण पूर्ण केले असून यंदा तब्बल ८२ इमारती अतिधोकादायक घोषित करण्यात आल्या आहेत. यामध्ये मागील वर्षी धोकादायक ठरलेल्या ४३ इमारतींचाही समावेश आहे.

गिरगाव, काळबादेवी, माझगाव, नागपाडा, कामाठीपुरा, दादर, माहिम आणि एलफिन्स्टन परिसरातील अनेक जुन्या इमारतींचा या यादीत समावेश आहे. या इमारतींमध्ये एकूण २२५६ निवासी आणि ४८० अनिवासी गाळेधारक असे मिळून २७३६ भाडेकरू आणि रहिवासी वास्तव्यास आहेत. म्हाडाकडून आतापर्यंत १७६ निवासी गाळेधारकांना इमारती रिक्त करण्याच्या नोटिसा बजावण्यात आल्या आहेत. त्यापैकी २९ कुटुंबांना संक्रमण शिबिरात स्थलांतरित करण्यात आले असून ३६ कुटुंबांनी स्वतः पर्यायी निवासाची व्यवस्था केली आहे. उर्वरित रहिवाशांना लवकरात लवकर इमारती रिक्त करण्याच्या सूचना देण्यात आल्या आहेत.

तसेच, सुमारे २१०२ रहिवाशांच्या पुनर्वसनासाठी संक्रमण शिबिरात व्यवस्था करण्याची प्रक्रिया सुरू असल्याची माहिती म्हाडाने दिली. पावसाळ्यात दुर्घटना टाळण्यासाठी रहिवाशांनी प्रशासनाला सहकार्य करावे आणि धोकादायक इमारती तातडीने रिक्त कराव्यात, असे आवाहन म्हाडाने केले आहे.दरम्यान, कोणतीही दुर्घटना किंवा इमारतीत धोक्याची चिन्हे आढळल्यास तात्काळ म्हाडा आणि मुंबई महानगरपालिकेच्या नियंत्रण कक्षाशी संपर्क साधण्याचे आवाहन करण्यात आले आहे.