पुणे: आज 5 सप्टेंबर शिक्षक दिन (Teachers Day) शिक्षक, गुरू यांच्याबद्दल कृतज्ञता व्यक्त करण्याचा दिवस. पुण्यात शिक्षण आयुक्त कार्यालयाबाहेर (Office of the Commissioner of Education in Pune) मात्र आज मन उद्विग्न करणारं दृष्य पाहायला मिळालं. गेले 49 दिवस रखडलेली प्राध्यापक भर्ती करावी म्हणून कधी भजन आंदोलन, कधी अर्धनग्न आंदोलन करून लक्ष वेधणाऱ्या नवप्राध्यापक संघटनेतर्फे स्वतः च्या तोंडाला काळे फासून सरकारचा निषेध करण्यात आला आहे.

कोरोनाच्या लॉकडाऊनचं कारण सांगत 18 हजार प्राध्यापकांची भर्ती रोखण्यात आली आहे. या पैकी 4000 प्राध्यापकांची भर्ती केली जाईल हे उच्च शिक्षण मंत्री उदय सामंत यांचं आश्वासन अर्थमंत्री अजित पवारांनी फाईल रोखून धरल्यामुळे हवेत विरलय असा आरोप प्राध्यापकांनी केला आहे.

तर याच ठिकाणी गेली 15 वर्षे विना वेतन काम करणाऱ्या कनिष्ठ महाविद्यालयातील प्राध्यापकांनी प्रतिकात्मक केस कापत या आंदोलन केलं अनुदान मंजूर न झाल्याने सुमारे 1200 प्राध्यापक शेतात काम करत,भाजीपाला विकत उदरनिर्वाह करत आहेत आम्ही मुलाबाळांचसह जीव दिल्यावर सरकार जागे होणार का असा सवाल या आंदोलक प्राध्यापकांनी विचारला आहे या आंदोलनाचा आज 4 था दिवस आहे.

Edited By: Pravin Dhamale