संजय गडदे, साम टीव्ही

मुंबई महानगरपालिका शिक्षण विभागाने मालवणी टाऊनशिप येथील मुंबई पब्लिक स्कूलमधील इयत्ता सहावी ते आठवीचे वर्ग खाजगी संस्थेला चालविण्यास दिल्याच्या निर्णयाला आमदार अस्लम शेख यांनी तीव्र शब्दांत विरोध केला आहे. पालिकने हा निर्णय त्वरित मागे घ्या, अन्यथा रस्त्यावर उतरून संघर्ष करू, असा इशारा असलम शेख यांनी आज झालेल्या पालक शिक्षक बैठकीत दिला आहे.

'पालिकेच्या शिक्षकांना बेरोजगार करून, खासगी संस्थांमार्फत शिक्षक नेमून शाळांचे खाजगीकरण करण्याचे षड्यंत्र सुरू आहे." त्यांनी प्रशासनावर ठपका ठेवत विचारले की, “इमारतींसाठी कोट्यवधी खर्च करणाऱ्या पालिकेकडे शिक्षक भरतीसाठी पैसे नाहीत का?” असा सवालही आमदार शेख यांनी उपस्थित केला आहे.

शेख यांनी शिक्षण अधिकाऱ्यांची चौकशी करण्याची मागणीही केली असून, “सीबीएसई वर्ग खासगी संस्थांना देणे, शिक्षक नियुक्ती खाजगी संस्थांकडून करणे, आणि यामागे असलेले संभाव्य आर्थिक हितसंबंध” यांचा तपशीलवार छडा घ्यावा, असेही ते म्हणाले.

शाळेतील सर्व वर्गांसाठी मनपा शिक्षक उपलब्ध असूनही खासगी संस्थेमार्फत शिक्षक नियुक्ती का? शिक्षणाचा दर्जा, शाळेतील विद्यार्थी संख्या व शिक्षण हक्क कायद्याचे उल्लंघन यावरही गंभीर प्रश्न उपस्थित करत शेख यांनी स्पष्ट शब्दांत सांगितले की, 'या शाळेचे खाजगीकरण रोखल्याशिवाय आम्ही स्वस्थ बसणार नाही'.