Mira Road News : मीरा रोडमधून एक धक्कादायक प्रकरण उघडकीस आले आहे. मीरा रोड येथील एका खासगी एअरलाइनमध्ये काम करणाऱ्या पायलटच्या विरोधात बलात्काराचा गुन्हा दाखल करण्यात आला आहे. २३ वर्षीय एअर हॉस्टेसने या पायलटवर बलात्काराचा आरोप केला आहे. या प्रकरणामुळे परिसरात खळबळ उडाली आहे.

मिळालेल्या माहितीनुसार, एअर हॉस्टेस आणि पायलट यांनी काही दिवसांपूर्वी लंडनला जाणाऱ्या विमानाने एकत्र प्रवास केला होता. ते दोघे मीरा रोडमध्ये राहत होते. मुंबईला परतल्यानंतर आपण एकाच परिसरात राहतो हे दोघांना समजले. जवळ राहत असल्याने ते दोघे मीरा रोडपर्यंत एकत्र प्रवास करु लागले. या कालावधीत आरोपीने पीडित तरुणीचा विश्वास संपादन केला.

पीडित तरुणीच्या तक्रारीनुसार, आरोपी पायलटने तरुणीला त्याच्या घरी येण्यासाठी आग्रह केला. एअर हॉस्टेस तरुणी पायलटच्या घरी गेली. दोघांनी घरात प्रवेश केल्यानंतर घरात कुणीही नसल्याचे पीडित तरुणीच्या लक्षात आले. एकटी असल्याचा फायदा उचलून आरोपीने पीडितेवर जबरदस्ती केली, तिच्यावर बलात्कार केला.

पायलटने सुरुवातीला एअर हॉस्टेसचा विश्वास जिंकला. त्यानंतर तिला एकटीला स्वत:च्या मीरा रोडमधील घरी आणले आणि तिच्यावर बलात्कार केला. या घटनेनंतर एअर हॉस्टेस तरुणीने पायलटच्या विरोधात बलात्काराची तक्रार केली. नवघर पोलीस ठाण्यामध्ये पायलटच्या विरुद्ध गुन्हा दाखल करण्यात आला आहे. आरोपी पायलट सध्या फरार असून पोलीस त्याचा शोध घेत आहेत.