रेल्वे प्रवासात धक्का लागणं, जागेसाठी होणारे वाद हे नवीन नाहीत...मात्र हे वाद आता जीवघेणे ठरत आहेत. मुंबईची लाईफलाईन असलेली ट्रेन आता रक्तानं माखू लागलीय...पुढे सरकण्याच्या शुल्लक वादातून एका 33 वर्षीय प्राध्यापकाला जीव गमवावा लागलाय. वाद झाल्यानंतर रागाच्या भरात आरोपीने मालाड रेल्वे स्थानकात गाडीतून उतरताना प्राध्यापकाच्या पोटात धारदार शस्त्राने वार करुन पळून गेला. प्राध्यापक आलोक सिंग हे गंभीररित्या जखमी झाले. लोकलमधून उतरुन ते प्लॅटफॉर्मवरील बाकावर बसले. रुग्णालयात उपचारादरम्यान त्यांचा मृत्यू झाला.

किरकोळ वादातून प्राध्यापकाला जीव गमवावा लागल्यानं ही रेल्वे प्रवाशांच्या सुरक्षेचा मुद्दा पुन्हा ऐरणीवर आलाय. आरोपी ओमकार शिंदे याला पोलिसांनी सापळा रचून अटक केली. आरोपी ओमकार शिंदेला कोर्टाने पाच दिवसांची पोलिस कोठडी सुनावलीय...

हा प्रश्न केवळ शिक्षेपुरता मर्यादित नसून, अशा घटना रोखण्यासाठी ठोस उपाययोजनांची गरज आहे. रेल्वे पोलीस आणि आरपीएफ अशा घटनांना आळा घालण्यासाठी नेमकी कोणती पावले उचलणार? लोकल ट्रेन आणि स्थानकांवरील सुरक्षा वाढवली जाणार का? धारदार शस्त्रांसह प्रवास करणाऱ्यांवर कठोर कारवाई होणार का? असे अनेक प्रश्न यानिमित्तानं उपस्थित होत आहेत.