निवृत्ती बाबर

Ravindra Chavan News : दरवर्षीप्रमाणे गणेशोत्सवासाठी कोकणात जाणाऱ्या गणेशभक्तांची लगबग असते. कोकणात जाणारे बहुतांश गणेशभक्त मुंबई-गोवा महामार्गाचा वापर करतात. याच मुंबई-गोवा महामार्गाची पाहणी राज्याचे सार्वजनिक बांधकाम मंत्री रविंद्र चव्हाण (Ravindra Chavan) यांनी केली. पाहणीनंतर मंत्री चव्हाण यांनी गणेशोत्सवाच्या आधी खड्डे बुजवण्याचे काम पूर्ण होईल, असा विश्वास व्यक्त केला आहे. तसेच 'नितीन गडकरी यांनी पैसे दिले. मात्र, काही ठिकाणी तांत्रिक अडचणी निर्माण झाल्या', असे रस्त्यावरील खड्ड्यांवरून मंत्री चव्हाण यांनी स्पष्टीकरण दिले.

सार्वजनिक बांधकाम मंत्री रविंद्र चव्हाण यांनी मुंबई-गोवा महामार्गाची पाहणी केल्यानंतर माध्यमांशी संवाद साधला. रविंद्र चव्हाण म्हणाले, 'मुंबई-गोवा महामार्गाच्या बाबतीत एक बैठक घेण्यात आली होती. त्यानंतर ठरवलं की गणपतीच्या अगोदर महामार्ग दुरुस्त व्हावा अशा सूचना दिल्या. सुरुवातीला २ कंत्राटदार होते, नंतर यासाठी १० कंत्राटदार नेमण्यात आले. सर्वांना सूचना दिल्या की, खड्डे लवकर बुजविले पाहिजे. गणेशोत्सवाच्या आधी खड्डे बुजवण्याचे काम पूर्ण होईल. काही ठिकाणी नवीन तंत्रज्ञानाद्वारे खड्डे बुजवले जात आहेत. काही ठिकाणी खडी डांबर टाकून बुजवले जात आहेत'.

'केंद्रीय मंत्री नितीन गडकरी यांनी पैसे दिले. मात्र काही ठिकाणी तांत्रिक अडचणी निर्माण झाल्या. काही ठिकाणी वेगवेगळ्या समस्या आहेत. यासाठी समन्वयाची गरज आहे. मागच्या सरकारच्या काळात काही ठिकाणी काम केले, तिथे देखील खड्डे पडले आहेत. त्याचं ऑडिट केले जाईल. मी स्वत: कोकणचा आहे. मला देखील या रस्त्याने जायचं आहे. त्यामुळे सर्व जे सूचना सांगतील, ते मी ऐकायला तयार आहे. केंद्र शासनाची किंवा राज्य सरकारच्या चुका नाहीत. तर मागच्या कंत्राटदाराच्या याबाबत चुका आहेत. अनेक कायदेशीर अडचणी आहेत. पाहणी दरम्यान अनेक बाबी लक्षात आल्या आहेत. मी कोणावर टीका करणार नाही', असेही चव्हाण म्हणाले.