विकास मिरगणे, नवी मुंबई प्रतिनिधी:

Navi Mumbai Airport Horror: नवी मुंबई आंतरराष्ट्रीय विमानतळापासून अवघ्या दोन किलोमीटर अंतरावर असलेल्या एका सुनसान रस्त्यावर कॅब चालकाने महिला प्रवाशाची छेडछाड करून तिचे कपडे काढण्याचा प्रयत्न केल्याची धक्कादायक घटना समोर आली आहे. महिलेने प्रतिकार करत आरडाओरड केल्याने आरोपी चालकाने घटनास्थळावरून पळ काढला. या प्रकरणी नवी मुंबई विमानतळ पोलिसांनी मोहम्मद अफजल शेख याच्याविरोधात भारतीय न्याय संहितेच्या विविध कलमांनुसार गुन्हा दाखल केला असून त्याचा शोध सुरू आहे.

पीडित महिला आपल्या मित्रांसोबत पार्टीसाठी चेंबूर येथे गेली होती. रात्री परतताना तिच्या एका मित्राने तिच्यासाठी कॅब बुक केली. त्यानंतर महिला कॅबमधून पनवेल येथील आपल्या घरी जाण्यासाठी निघाली. रात्री सुमारे एक वाजण्याच्या सुमारास कॅब नवी मुंबई विमानतळापासून जवळपास दोन किलोमीटर अंतरावर असलेल्या एअरपोर्ट सर्व्हिस रोडवर पोहोचली. तो परिसर पूर्णपणे सुनसान होता. तिथे चालकाने अचानक कॅब थांबवली आणि पाणी पिण्याचे कारण सांगून तो खाली उतरला.

काही वेळाने चालक पुन्हा कॅबमध्ये आला आणि थेट मागील सीटवर बसलेल्या महिलेच्या शेजारी जाऊन बसला. त्याने महिलेचा हात पकडून तिचे कपडे काढण्याचा प्रयत्न केला. या अचानक घडलेल्या प्रकारामुळे महिला अत्यंत घाबरली, परंतु तिने धैर्याने जोरजोरात आरडाओरड करण्यास सुरुवात केली.

ही घटना रात्री सुमारे दीड वाजण्याच्या सुमारास घडली. परिसर सुनसान असल्याने त्यावेळी आसपास कोणीही नव्हते. तरीही महिलेने कसाबसा स्वतःचा बचाव करत कॅबमधून बाहेर सुटका करून घेतली. महिला बाहेर पडताच आरोपी चालक गाडी घेऊन घटनास्थळावरून फरार झाला.

घटनेनंतर पीडित महिलेने तात्काळ आपल्या कुटुंबीयांशी संपर्क साधून घडलेला प्रकार सांगितला आणि सुरक्षितपणे घर गाठले. महिलेने दिलेल्या तक्रारीवरून नवी मुंबई विमानतळ पोलिसांनी मोहम्मद अफजल शेख याच्याविरोधात गुन्हा दाखल केला आहे. आरोपीचा शोध घेण्यासाठी पोलिसांकडून तांत्रिक तपास सुरू असून कॅबच्या माहितीच्या आधारे त्याचा माग काढला जात आहे.