MHADA Lottery 2023: मुंबईत आपलं स्वत:चं हक्काचं घर असावं असं प्रत्येकाचं स्वप्न असतं. म्हाडाच्या (MHADA) मुंबई गृहनिर्माण व क्षेत्रविकास मंडळातर्फे ४ हजार ८२ सदनिका विक्रीसाठी जाहीर झालेल्या आहेत. यामध्ये नागरिकांचा उत्तम प्रतिसाद मिळताना दिसतोय. अशात आज अर्ज करण्याचा शेवटचा दिवस आहे. (Latest Marathi News)

विक्रीसाठी असलेल्या संगणकीय सोडत प्रक्रियेला नागरिकांकडून उत्तम प्रतिसाद मिळताना दिसतोय. १० जुलै ही अर्ज सादर करण्याची शेवटची तारीख असून आतापर्यंत सव्वालाख नागरिकांनी अर्ज सादर केला आहे. तर अनामत रक्कम भरलेल्या नागरिकांची संख्या ९८ हजारांवर पोहचली आहे.

सोडत कुठे निघणार?

वांद्रे पश्चिम (Bandra West) येथील रंगशारदा नाट्यगृहात सदनिकांच्या वितरणाकरिता प्राप्त झालेल्या अर्जांची संगणकीय सोडत काढण्यात येणार आहे. सोडतीचा दिनांक आणि वेळ लवकरच जाहीर केली जाईल. १० जुलै म्हणजेच आज सायंकाळी ६ वाजेपर्यंत तुम्ही ऑनलाइन अर्ज सादर करू शकता. तसेच रात्री ११:५९ वाजेपर्यंत अनामत रकमेचा ऑनलाइन भरणा करू शकता.