MBBS Admission Scam Busted : एमबीबीएस (MBBS) प्रवेशाचे आमिष दाखवून देशभरातील विद्यार्थ्यांची फसवणूक करणाऱ्या तेलंगणातील एका महाठगाला पुणे पोलिसांनी बेड्या ठोकल्या आहेत. आरोपीने बनावट मार्गदर्शन केंद्र सुरू करून विद्यार्थ्यांना समुपदेशन (Counseling) देण्याच्या बहाण्याने कोट्यवधी रुपये उकळले होते. आदित्यकुमार उर्फ अरविंद प्रकाशकुमार आरोगोंडा (वय ४७) असे अटक करण्यात आलेल्या आरोपीचे नाव आहे.

आरोपीवर यापूर्वीच मुंबई आणि हैदराबाद येथे फसवणुकीचे सहा गुन्हे दाखल आहेत. पुण्यात एका पालकाची ८.२५ लाख रुपयांची फसवणूक झाल्यानंतर पोलिसांनी तपास सुरू केला आणि हे मोठे रॅकेट उघडकीस आले. पोलिसांनी दिलेल्या माहितीनुसार, या प्रकरणातील एका पीडित पालकाने पुण्याच्या येरवडा पोलीस ठाण्यात तक्रार दाखल केली होती. या तक्रारीवरून तपास करत असताना, आरोपीने पुणे आणि परिसरातील अनेक पालकांकडून कोट्यवधी रुपये उकळल्याचे निष्पन्न झाले.

आरोपी आणि त्याच्या साथीदाराने हैदराबाद येथे ‘एडव्हिओ लर्निंग सोल्यूशन्स प्रा. लि.’ नावाची एक बनावट कंपनी स्थापन केली होती. या आरोपींनी पुणे आणि मुंबई येथे विद्यार्थ्यांसाठी 'प्रवेश मार्गदर्शन केंद्र' सुरू केले होते. ऑनलाइन माध्यमातून विद्यार्थ्यांशी संपर्क साधून, शासकीय वैद्यकीय महाविद्यालयात प्रवेश मिळवून देण्यासाठी ५ लाख रुपये, तर खासगी महाविद्यालयांसाठी ३ लाख रुपये 'समुपदेशन फी' म्हणून ते आकारत असत.

दरम्यान, आरोपी अरविंद आरोगोंडा याला काही दिवसांपूर्वी मुंबईच्या पवई पोलिसांनी अशाच एका फसवणुकीच्या गुन्ह्यात अटक केली होती. त्याची रवानगी मुंबईतील आर्थर रोड कारागृहात करण्यात आली होती. पुण्याच्या येरवडा पोलिसांच्या पथकाने न्यायालयाची परवानगी मिळवून, आरोपीला पुढील तपासासाठी आर्थर रोड कारागृहातून ताब्यात घेतले आहे.