Maval News :

मावळ तालुका खरेदी-विक्री संघाच्या निवडणुकीत (maval taluka kharedi vikri sangh election) महायुतीने बाजी मारली आहे. एका जागेसाठी समसमान मतं पडल्याने ईश्वर चिठ्ठी काढण्यात आली. यामुळे महायुतीच्या पदरात ती जागा पडली आहे. त्यामुळेच मावळ तालुक्यातील खरेदी विक्री संघावरती महायुतीची (राष्ट्रवादी काँग्रेस, भाजप व शिवसेना) एक हाती सत्ता आली. (Maharashtra News)

आगामी लोकसभा निवडणुकीच्या (lok sabha election 2024) पार्श्वभूमीवर मावळ तालुक्यामध्ये खरेदी-विक्री संघाच्या निवडणुकीत चुरस पाहायला मिळाली. या निवडणुकीमध्ये पहिल्यांदाच महायुती म्हणून उमेदवार देण्यात आले हाेते.

यात मावळ तालुका खरेदी-विक्री संघाच्या निवडणुकीत महायुतीने सोळा जागा जिंकल्या. या निवडणूकीत महत्त्वाच्या असलेल्या (अ) गटातील तीन उमेदवारांचा पराभव झाला मात्र शेवटी एक जागा ईश्वर चिट्ठीने महायुतीच्या पदरात पडली. समान मतदान झाल्यामुळे विजयी उमेदवार घोषित करण्यासाठी ईश्वर चिट्ठीची मदत घेण्यात आली.

या प्रक्रियेनंतर महायुतीचे शिवाजी आसवले यांना विजयी घाेषित करण्यात आले. या निवडणुकीसाठी राष्ट्रवादी, भाजप, शिवसेना महायुतीच्या वतीने महायुती सहकार पॅनलच्या माध्यमातून निवडणूक जिंकण्याचा निर्धार केला होता. आता मावळ तालुका खरेदी-विक्री संघावर महायुतीचीच एक हाती सत्ता आली आहे.

(साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

Edited By : Siddharth Latkar