Summary -

• मुंबईतील चांदिवलीमध्ये व्यावसायिक इमारतीला भीषण आग

• ४ मजली इमारतीमधील तिसऱ्या मजल्यावर आग

• आगित होरपळून दोन तरुणांचा मृत्यू

• ३ तासांच्या प्रयत्नांनंतर आग आटोक्यात आणण्यात यश

मुंबईतील चांदिवली परिसरात इमारतीला भीषण आग लागली. बुधवारी संध्याकाळी साडेसहा वाजताच्या सुमारास एका व्यावसायिक इमारतीत भीषण आग लागली. या आगीमध्ये होरपळून दोन तरुणांचा मृत्यू झाला. आग भीषण असल्यामुळे संपूर्ण इमारत रिकामी करण्यात आली होती. ३ तासांच्या प्रयत्नांनंतर अग्निशमन दलाने ही आग विझवली.

मिळालेल्या माहितीनुसार, अंधेरी पूर्वच्या चांदिवली परिसरातील साकी विहार रोडवरील नारायण प्लाझा या इमारतीच्या तिसऱ्या मजल्यावरील एका कारखान्याला भीषण आग लागली. बुधवारी संध्याकाळी ६.३६ वाजता ही घटना घडली. अग्निशमन दलाच्या जवानांनी घटनास्थळी धाव घेतली. तब्बल ३ तासांच्या अथक प्रयत्नांनंतर आग आटोक्यात आणण्यात आी. या आगीमुळे ४ मजली इमारत पूर्णपणे रिकामी करण्यात आली होती. या घटनेमुळे परिसरात काही काळ गोंधळाचे वातावरण होते.

मेसर्स निओसेल इंडस्ट्रीज (युनिट क्रमांक ३०३) येथील चार मजली इमारतीच्या तिसऱ्या मजल्यावर आग लागली. आग संपूर्ण मजल्यावर वेगाने पसरत गेली आणि क्षणात सगळीकडे धूराचे लोट पसरले. बचाव कार्यादरम्यान अग्निशमन दलाच्या जवानांना कार्यालयात दोन तरुण बेशुद्ध अवस्थेत आढळून आले. दोघांनाही तातडीने रुग्णालयात नेण्यात आले. पण डॉक्टरांनी त्यांना मृत घोषीत केले.

भगवान पितळे (३० वर्षे) या तरुणाला सेव्हन हिल्स रुग्णालयात नेण्यात आले. तर सुमंत जाधव (२८ वर्षे) या तरुणाला राजावाडी रुग्णालयात नेण्यात आले. दोघांनाही डॉक्टरांनी मृत घोषीत केले. या आगीत कारखान्यातील इलेक्ट्रिकल वायरिंग, फर्निचर, लिथियम-आयन बॅटरी, ऑफिसच्या फाईल्स, लाकडी पार्टीशन आणि फॉल्स सीलिंग पूर्णपणे जळून खाक झाले.आग आटोक्यात आल्यानंतर, अग्निशमन दलाच्या जवानांनी कुलिंग ऑपरेशन सुरू केले जे रात्री उशिरापर्यंत सुरू होते. आगीचे कारण सध्या शोधले जात आहे. पण ही आग शॉर्ट सर्किटमुळे लागल्याचा अंदाज व्यक्त केला जात आहे.