Mumbai Ahmedabad National Highway : वनपट्ट्यांसह विविध बावीस मागण्यांच्या पुर्ततेसाठी मार्क्सवादी कम्युनिस्ट पार्टीच्यावतीने आज (मंगळवार) मुंबई अहमदाबाद राष्ट्रीय महामार्ग रोखून धरला. हे आंदाेलन तब्बल दीड तास डहाणूतील चारोटी येथे हजारो माकपाच्या कार्यकर्त्यांनी छेडले. (Maharashtra News)

देशात वाढत चाललेली बेरोजगारी, वनपट्ट्या संबंधीचे प्रश्न, केंद्राच्या वाढवण बंदराला विरोध , देशात आणि राज्यात वाढत चाललेले महिला अत्याचार या विरोधात मार्क्सवादी कम्युनिस्ट पार्टीने आज एल्गार पुकारला. या रास्ता रोकोमुळे मुंबई अहमदाबाद राष्ट्रीय महामार्गावर दोन्ही बाजूला वाहनांच्या लांबच लांब रांगा पाहायला मिळाल्या.

केंद्रातील मोदी सरकार आणि राज्यातील शिंदे फडणवीस सरकार विरोधात आक्रमक झालेल्या अखिल भारतीय किसान सभा आणि मार्क्सवादी कम्युनिस्ट पार्टीच्या 20 हजार पेक्षा अधिक कार्यकर्त्यांनी रस्त्यावर उतरत मुंबई अहमदाबाद राष्ट्रीय महामार्ग पालघर मधील चारोटी येथे दीड तास रोखून धरला.

यावेळी रास्ता रोको करत कार्यकर्त्यांनी मोदी सरकार आणि राज्यातील शिंदे फडणवीस सरकार विरोधातजोरदार घोषणाबाजी केली. केंद्र आणि राज्य सरकारकडे वारंवार मागणी करून ही सरकार दुर्लक्ष करत असल्याने राष्ट्रीय महामार्ग रोखून धरण्याचा आक्रमक पवित्रा घेतल्याच यावेळी आंदोलनकर्त्यांकडून सांगण्यात आलं.

अखिल भारतीय किसान सभेचे अशोक ढवळे , मार्क्सवादी कम्युनिस्ट पार्टीचे डहाणूचे आमदार विनोद निकोले यांच्या नेतृत्वाखाली या रास्ता रोकोचे आयोजन करण्यात आले हाेते. यावेळी आमदार विनोद निकोले, अशोक ढवळे तसेच उदय नारकर यांच्यासह आंदाेलकांनी (aandolan) मागण्या मान्य न झाल्यास मार्क्सवादी कम्युनिस्ट पार्टी पुन्हा रस्त्यावर उतरेल असा इशारा दिला.

Edited By : Siddharth Latkar