संघर्ष गांगुर्डे, साम टीव्ही

केडीएमसीच्या कारवाईनंतर चर्चेत आलेला मराठी तरुणीचा शोरमा व्यवसाय पुन्हा एकदा डोंबिवलीत सुरू होत आहे. मराठी तरुणी एकता सावंत हिने मनसे अध्यक्ष राज ठाकरे यांचा फोटो लावून शोरमाचा स्टॉल उभारला आहे. व्यवसाय सुरू करण्याची सर्व तयारी पूर्ण केली आहे.

या पार्श्वभूमीवर मनसे नेते अविनाश जाधव यांनी डोंबिवलीत येऊन एकता सावंतच्या शोरमा स्टॉलला भेट दिली. यावेळी त्यांनी प्रशासनाच्या भूमिकेवर तीव्र शब्दांत नाराजी व्यक्त केली. अविनाश जाधव म्हणाले की, २०१७ साली आम्ही वारंवार ओरडून सांगत होतो की १५० मीटर परिसरात फेरीवाल्यांवर बंदी घाला. मात्र पोलीस प्रशासन, महापालिका प्रशासन आणि रेल्वे प्रशासनाने आमचे ऐकले नाही. आज २०२६ उजाडले तरी परिस्थिती जैसे थेच आहे.

ते पुढे म्हणाले की, सर्वांनी नियम पाळावेत, त्यानंतर आम्हीही नियम पाळू. नियम सर्वांसाठी समान आहेत, मग केवळ या मराठी तरुणीवरच बंदी का घातली जाते?असा थेट सवाल त्यांनी प्रशासनाला केला.

केडीएमसीने या स्टॉलवर कारवाई केल्यास २०१७ ते २०२६ या कालावधीत महापालिकेने नेमकी किती फेरीवाल्यांवर कारवाई केली, याची सविस्तर माहिती द्यावी, अशी मागणीही अविनाश जाधव यांनी यावेळी केली. मराठी तरुणीने स्वबळावर उभा केलेला व्यवसाय आणि त्याला मिळणारा मनसेचा पाठिंबा यामुळे हा विषय पुन्हा एकदा राजकीय आणि सामाजिक वर्तुळात चर्चेचा ठरला आहे. स्थानिक नागरिकांमध्येही या कारवाईबाबत संमिश्र प्रतिक्रिया उमटत असून पुढे प्रशासन काय भूमिका घेते, याकडे सर्वांचे लक्ष लागले आहे.