संजय गडदे, मुंबई

महाराष्ट्रात राहून मराठी भाषा बोलण्यास नकार दिल्याच्या मुद्यावरून अनेकदा वाद निर्माण झाल्याच्या घटना सतत समोर येत आहेत. चारकोपमधील एअरटेल गॅलरी येथे काम करणाऱ्या महिला कर्मचारीने मराठीत बोलण्यास नकार देण्याचा प्रकार तसेच वर्सोवा येथील डी मार्टमधील कर्मचाऱ्याकडून 'मुझे मराठी आती नही मै हिंदी बोलुंगा' असे म्हणत वाद झाल्याचे प्रकार त्याचे असतानाच आता मुंबईत असाच आणखी एक प्रकार घडला आहे. मराठी न बोलणाऱ्या सुरक्षारक्षकाला मनसैनिकांनी चांगलाच चोप दिला आहे.

मुंबईतील पवई येथे असणाऱ्या एल अँड टी कंपनीतील सुरक्षारक्षकाने मराठी भाषेविषयी अपमानजनक वक्तव्य केले. मला मराठी येत नाही असं म्हणत 'मराठी गया तेल लगाने'असं वक्तव्य या सुरक्षारक्षकाने केले. त्यामुळे सुरक्षारक्षक आणि तरुणामध्ये वाद झाला. सुरक्षारक्षकाने मराठीत बोलावे असा आग्रह तरुणाने धरला. पण 'मुझे मराठी आती नही हिंदी बोलता हू मराठी गया तेल लगाने' असे मराठी भाषेविषयी अपमानजनक वक्तव्य सुरक्षारक्षकाने केले. त्याच्या या वक्तव्यामुळे नवा वाद निर्माण झाला आहे. या वादात मनसेने उडी घेत सुरक्षारक्षकाला कानशिलात लगावताच त्या सुरक्षारक्षकाने मनसे प्रमुख राज ठाकरे आणि मराठी माणसाची माफी मागितली.

मनसे अध्यक्ष राज ठाकरे यांनी गुढीपाडव्याच्या सभेमध्ये मराठीच्या मुद्द्यावरून आक्रमक भूमिका घेतली. मराठी भाषेचा वापर करण्याचा त्यांनी आग्रह धरला. मराठी बोलला नाही तर कानफटीतच बसणार, असा सणसणीत इशारा राज ठाके यांनी दिला. त्यानंतर मनसैनिक कामाला लागले. मराठी न बोलणाऱ्यांना परप्रांतीयांना मनसैनिकांकडून चोप देण्यास सुरूवात केली आहे. मराठीचा अपमान करणारे आता मनसैनिकांच्या रडारवर आहेत. बँक, रेल्वे स्टेशन, सरकारी आस्थापनांमध्ये मराठीचा वापर करण्याचा आग्रह मनसेकडून धरण्यात आला आहे. मराठीचा वापर जर केला नाही तर खळखट्याक करण्याचा इशारा मनसैनिकांनी दिला आहे.