मुंबई : मराठा आरक्षणावरून राजकीय वातावरण चांगलंच तापलं आहे. गेल्या ५ दिवसांपासून मनोज जरांगे यांनी आझाद मैदानात ठाण मांडलं आहे. आझाद मैदानात मोठ्या संख्येने मुंबईत आलेल्या मराठा आंदोलकांनी सीएसएमटी रेल्वे स्टेशनवर मुक्काम ठोकला आहे. सीएसएमटी परिसरात थांबलेल्या मराठा आंदोलकांकडून नियमांचं उल्लंघन होत असल्याचं कोर्टाच्या निर्दशनास आलं आहे. त्यानंतर पोलिसांनी मनोज जरांगेंना आझाद मैदान खाली करण्याचे आदेश दिले आहेत. तर रेल्वे प्रशासनाकडूनही मराठा आंदोलकांना महत्वाच्या सूचना दिल्या आहेत.

मुंबई पोलिसांनी मनोज जरांगे यांच्या कोअर कमिटीला नोटीस बजावली आहे. आझाद मैदान परिसरात उल्लंघन केल्याप्रकरणी नोटीस बजावली आहे. या नोटिशीनंतर मनोज जरांगे यांना आझाद मैदान रिकामे करावं लागणार आहे. पोलिसांच्या नोटिशीनंतरही मनोज जरांगे काय भूमिका घेतात, याकडे साऱ्यांचं लक्ष लागलं आहे. दुसरीकडे रेल्वे प्रशासनाने मराठा आंदोलकांना महत्वाच्या सूचना जारी केल्या आहेत.

मुंबईच्या छत्रपती शिवाजी महाराज रेल्वे स्थानकात मराठा आंदोलकांनी त्यांच्या मागण्या शांततेत आणि लोकशाही पद्धतीने पूर्ण करण्याच्या सूचना दिल्या आहेत. तर मराठा आंदोलकांनी वयोवृद्ध, दिव्यांग प्रवाशांसाठी अडचण होणार नाही. त्रास होणार नाही याची दक्षता घेत मार्ग मोकळा करून देण्याच्याही सूचना दिल्या आहेत. आझाद मैदानाकडे जाण्यासाठी जाणाऱ्या भुयारी मार्गाचा वापर करण्याचे आदेश दिले आहेत.

महिलांच्या डब्यातून किंवा राखीव डब्यातून मराठा बांधवांनी प्रवास करू नये अशा सूचनाही आंदोलकांना रेल्वे स्थानकात रेल्वे प्रशासन करण्यात येत आहे. रेल्वे प्रशासनाच्या सूचनेनंतर मराठा आंदोलक नियमांचं पालन करतात का, हे पाहावे लागणार आहे.