ओबीसी प्रवर्गातून मराठा आरक्षण मिळावे यासाठी मराठा आंदोलक मनोज जरांगे पाटील यांनी आक्रमक भूमिका घेतली आहे. मुंबईतील आझाद मैदानावर सुरू असलेल्या आंदोलनाचा आज तिसरा दिवस असून, तिसऱ्या दिवशी त्यांनी पत्रकार परिषदेत अन्न-पाण्याचा त्याग करण्याचा निर्णय घेतला. यावेळी मंत्री चंद्रकांत पाटील यांनी जरांगे पाटलांवर टीका केली. 'राजकीय आरक्षण मिळावे यासाठीच मनोज जरांगे पाटील यांनी मुंबईत आंदोलन सुरू केलंय', असं ते म्हणाले. चंद्रकांत पाटलांच्या टीकेवर जरांगे पाटील यांनी प्रत्युत्तर दिलंय.

पत्रकार परिषदेत चंद्रकांत पाटील यांनी केलेल्या टीकेवर जरांगे पाटील यांच्याकडे प्रतिक्रिया घेण्यात आली. यावेळी जरांगे पाटील म्हणाले, 'चंद्रकांत पाटील यांना सांगा, त्यांनी चांगलं काम केलं म्हणून आम्ही चांगलं बोललो. पण आता वचवच करू नये. त्यांना काय अक्कल आहे? त्यामुळेच त्यांना काढून टाकलंय', असा घणाघात जरांगे पाटील यांनी केला. 'चंद्रकांत पाटलांनी शांत राहावं, मराठ्यांच्या शिव्या खाऊ नये.', असंही जरांगे पाटील म्हणाले.

'चंद्रकांत पाटील यांनी मुख्यमंत्र्यांच्या सांगण्यावरून पडताळणी रोखली होती. कोल्हापूर म्हणजे आमच्याच राजघराण्याच्या कचाट्यात ते राहातात,'असं जरांगे पाटील म्हणाले. शेवटी जरांगे पाटील यांनी थेट इशारा दिला. 'पाटील यांनी जास्त बोलू नये. शांत राहावे. जास्त बोलले तर, त्यांचा गेम वाजवला म्हणून समजा', असा थेट इशारा जरांगे पाटील यांनी दिला.

चंद्रकांत पाटील नेमकं काय म्हणाले?

चंद्रकांत पाटील यांनी मनोज जरांगेंवर सडकून टीका केली आहे. 'सर्व प्रश्न सोडवले. मात्र, तरीही आता केवळ राजकीय आरक्षण मिळावे यासाठी मनोज जरांगे पाटील मुंबईत दाखल झाले. त्यांनी मुंबईत आंदोलनाला सुरूवात केली आहे. जरांगे पाटील यांनी मुंबईतील सर्वसामान्य नागरिकांना वेठीस धरू नये', असे आवाहन मंत्री चंद्रकांत पाटील यांनी केले आहे.