Mumbai News :

नवऱ्याने बायकोला जिवंत जाळण्याचा प्रयत्न केल्याची घटना मुंबईतून समोर आली आहे. व्यसनी नवऱ्याच्या त्रासाला कंटाळून पोलिसात तक्रार देण्यासाठी जात असलेल्या महिलेला पतीने जाळण्याचा प्रयत्न केला आहे. पीडित महिला यात थोडक्यात बचावली आहे. यानंतर आरोपी पतीने पोलिसांना देखील फसवण्याचा प्रयत्न केला. मात्र पोलिसांच्या हुशारीमुळे आरोपी पतीविरोधात गुन्हा दाखल झाला आहे. (Mumbai News)

मिळालेल्या माहितीनुसार, आरोपी पतीने जाळण्याचा प्रयत्न केल्यानंतर पत्नीला वाचवण्याचा देखील प्रयत्न केला. यात त्याचा हात देखील भाजल्याचे सांगितले. महिलेने जबाबातही प्रथम स्टोव्हच्या स्फोटामुळे भाजल्याचे सांगितले होते.. दरम्यान पीडित महिलेवर कुपर रुग्णालयात उपचार सुरू असताना घडलेल्या घटनेची पाहणी करण्यासाठी अंधेरी पोलीस गेले होते. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

त्यावेळी पोलिसांना घटनास्थळी कुठेही स्टोव्ह आढळला नाही, त्यामुळे त्यांना संशय आला. पोलिसांनी तहसीलदार यांच्याकडे महिलेचा जबाब नोंदवण्याची परवानगी केली आणि पुन्हा महिलेचा जबाब नोंदवला.

त्यानंतर महिलेने व्यसनाच्या आहारी गेलेल्या पतीची पोलिसात तक्रार देण्यासाठी जात असल्याच्या रागातून जाळण्याचा प्रयत्न केल्याचे सांगितले. दरम्यान या प्रकरणी अंधेरी पोलिसांनी आरोपी अजय परमार विरोधात ३०७, ४९८ (अ),५०६ भादवी कलमांतर्गत गुन्हा दाखल केला आहे. या प्रकरणी अंधेरी पोलीस अधिक तपास करत आहेत.