गणेश कवडे, साम टीव्ही

मुंबई : महायुतीचा सत्तेस्थापनाचा पेच सुटला आहे. महायुतीच्या नेत्यांनी आज राज्यपाल सी पी राधाकृष्णन यांच्याकडे सत्तेस्थापनाचा दावा केला. महायुती सरकारचा शपथविधी उद्या गुरवारी शपथविधी होणार आहे. या सोहळ्यात एक मुख्यमंत्री आणि दोन उपमुख्यमंत्री शपथ घेणार आहेत. या शपथविधीनंतर महायुती सरकारची उद्या मंत्रालयात बैठक होणार असल्याची माहिती सूत्रांनी दिली आहे.

विधानसभा निवडणुकीत यंदा महायुतीची त्सुनामी पाहायला मिळाली. या निवडणुकीत महायुतीने महाविकास आघाडीला जोरदार दणका दिला. महायुतीच्या यशापुढे महाविकास आघाडीची गाडी ४६ जागांवर थांबली. निवडणुकीतील अभूतपूर्वक यशानंतर महायुतीने तातडीने सत्तास्थापनेसाठी पावले उचली. मात्र, महायुतीमध्ये खातेवाटपात ११ दिवस गेले. तरी त्यात पूर्णत तोडगा निघालेला नाही, अशी माहिती सूत्रांनी दिली आहे.

सूत्रांनी दिलेल्या माहितीनुसार, आज महायुतीने सत्तेस्थापनेसाठी राज्यपालांकडे दावा केला. तसेच त्यानंतर पत्रकार परिषदेत महायुतीने देवेंद्र फडणवीस होणार, असल्याचेही जाहीर केले. महायुतीच्या उद्या होणाऱ्या शपथविधी सोहळ्यानंतर पहिल्या मंत्रिमंडळात पहिली बैठक होणार आहे.

या पहिल्या मंत्रिमंडळाच्या बैठकीत महायुतीकडून मोठ्या निर्णयाची घोषणा होण्याची शक्यता आहे. या पहिल्या मंत्रिमंडळाच्या बैठकीत लाडकी बहीण योजनेविषयी काय निर्णय घेतला जातो, याकडे साऱ्यांचे लक्ष असणार आहे.

देवेंद्र फडणवीस यांच्या भेटीनंतर रामदास आठवले काय म्हणाले?

देवेंद्र फडणवीस उद्या मुख्यमंत्री पदाची शपथ घेणार असल्यामुळे आज त्यांची भेट घेण्यासाठी राज्यातील अनेक ठिकाणाहून नागरिक मुंबईतील सागर बंगल्यावर गर्दी करताना पाहायला मिळाले. रामदास आठवले यांनीही सागर बंगल्यावर हजेरी लावली.

यावेळी त्यांना माध्यम प्रतिनिधींशी संवाद साधताना ठाकरे गटाचे नेते संजय राऊत यांच्यावर टीका केली. आमचे आंतरराष्ट्रीय संबंध आहेत त्यामुळे आम्ही परदेशातील लोकांना सुद्धा बोलवू. संजय राऊत यांनी टीका करण्यापेक्षा त्यांच्या नेत्यांना सुद्धा उद्यासाठी बोलावलं आहे. उद्धव ठाकरे आमच्यासोबत असते तर त्यांचा मान सन्मान आणखी वाढला असता रामदास आठवले म्हणाले.