Mahrashtra Today 15th March Weather Temprature राज्यात उन्हाच्या कडाक्यासोबत काही भागांत पावसाळी वातावरण झालेलं पाहायला मिळत आहे. विदर्भात उष्णतेची तीव्र लाट आली असून अमरावती येथे देशातील सर्वात उच्चांकी तापमानाची नोंद झाली. आज विदर्भात तुरळक ठिकाणी उष्ण लाटेचा, तर मध्य महाराष्ट्र, मराठवाडा आणि विदर्भात वादळी वाऱ्यासह पावसाचा अंदाज असल्याने येलो अलर्ट देण्यात आला आहे. उर्वरित राज्यात उन्हाचा चटका कायम राहण्याची शक्यता हवामान विभागाने वर्तवली आहे.

हवेचा कमी दाबाचा पट्टा सक्रिय झाल्याने राज्यात पावसाला पोषक हवामान होत आहे. तसेच कमाल तापमान ४० अंशापार गेल्यास व तापमानात सरासरीच्या तुलनेत ४.५ अंशांपेक्षा अधिक वाढ झाल्यास उष्णतेची लाट आल्याचे समजले जाते. अमरावतीत सलग तिसऱ्यादिवशी ४१ अंश इतके तापमान नोंदवण्यात आले.

आज अकोला, अमरावती येथे उष्ण लाटेची शक्यता आहे. तर मध्य महाराष्ट्रातील सातारा, सांगली, सोलापूर, मराठवाड्यातील बीड, धाराशिव, पूर्व विदर्भातील चंद्रपूर, गडचिरोली जिल्ह्यात वादळी वाऱ्यासह पावसाचा अंदाज असल्याने येलो अलर्ट देण्यात आला आहे.

सातारा आणि कोल्हापुरात वादळी वाऱ्यासह गारांचा पाऊस पडलेला पाहायला मिळाला. तर उर्वरित राज्यात उन्हाचा चटका आणि उकाडा कायम राहण्याचा व तुरळक ठिकाणी विजांसह पावसाचा अंदाज हवामान विभागाने वर्तवला आहे.