Rain Alert in Maharashtra: गेल्या आठवडाभरापासून राज्यात पावसाचा जोर कमी झाला होता. मात्र, आता राज्यात पुन्हा मान्सून सक्रिय झाला असून पुढील ५ दिवसांत बहुतांश भागात मुसळधार पाऊस कोसळेल असा, अंदाज हवामान खात्याने वर्तवला आहे. यापार्श्वभूमीवर मुंबईसह तब्बल १७ जिल्ह्यांना ऑरेंज आणि यलो अलर्टही जारी करण्यात आला आहे.

गेल्यावर्षीच्या तुलनेत यंदा मान्सून राज्यात उशीराने दाखल झाला. मात्र, त्यानंतर पावसाने दमदार आगमन केलं. मुंबईतही पावसाने (Rain News) दमदार बॅटिंग केली. पण आठवडाभरापासून काही भागात पावसाने उसंत घेतली होती. पण आता राज्यात पुन्हा पावसाचा जोर वाढणार असल्याचं हवामान खात्याने सांगितलं आहे.

हवामान विभागाने जारी केलेल्या अंदाजानुसार, राज्यात पुढील ४ ते ५ दिवस मान्सून सक्रिय (Monsoon 2023) राहणार आहे. या कालावधीत कोकण आणि मध्य महाराष्ट्राच्या काही भागात मुसळधार ते अतिमुसळधार पावसाची शक्यता आहे. तर मराठवाड्यातही मुसळधार पावसाचा अंदाज आहे.

याशिवाय कोकण, गोवा, मध्य महाराष्ट्रात ऑरेंज अलर्ट व जोरदार पावसाचा इशारा दिला आहे. विदर्भातही ऑरेंज अलर्ट दिला आहे. पुण्यात मात्र यलो अलर्ट देण्यात आला आहे. घाट परिसरात बुधवारी तुरळक ठिकाणी अतिवृष्टीही होऊ शकते.

साताऱ्यात घाट परिसरात बुधवार ते शुक्रवार ऑरेंज अॅलर्ट आहे, तर कोल्हापूर जिल्ह्यात घाट परिसरात तुरळक ठिकाणी मुसळधार पाऊस (Rain Alert) होण्याची शक्यता आहे. दुसरीकडे मुंबईत सोमवारपासून मुसळधार पाऊस सुरू आहे. येत्या दोन ते तीन दिवसांत मुंबईसह उपनगरात पावसाचा जोर आणखीच वाढणार, असंही हवामान खात्याने सांगितलं.

Edited by - Satish Daud