Maharashtra Political News: राष्ट्रवादीतून बंड करत शिंदे-फडणवीस सरकारमध्ये सामील झालेल्या अजित पवार गटाने आगामी निवडणुकांसाठी मोर्चेबांधणी सुरू केली आहे. आगामी लोकसभा निवडणूक लक्षात घेता, अजित पवार गटाकडून राज्याचा दौरा करण्यात येणार आहे. याशिवाय ९ मंत्र्यांकडून राष्ट्रवादी प्रदेश कार्यालयात जनता दरबार सुद्धा सुरू करण्यात येणार आहे.

शुक्रवारी मुंबईतील मंत्रालयासमोरील पक्ष कार्यालयात अजित पवार गटाचे प्रदेशाध्यक्ष सुनील तटकेर यांनी पक्षातील पदाधिकारी तसेच नेत्यांची बैठक घेतली. या बैठकीत पक्षाचे नेते तसेच मंत्री सप्टेंबरमध्ये लोकसभेच्या सर्व मतदारसंघांमध्ये पक्षवाढीसाठी दौरे करतील, असा निर्णय घेण्यात आला.

विशेष बाब म्हणजे, अजित पवार गटाकडून ज्या लोकसभा मतदारसंघात पक्षवाढीसाठी दौरे करण्यात येणार आहे, त्यात शिंदे गटातील १३ खासदारांच्या मतदारसंघांचाही समावेश आहे. यापूर्वी भाजपने काही महिन्यांआधीच शिंदेंचे खासदार असलेल्या मतदारसंघांमध्ये दौरे सुरू केले, सोबतच काही केंद्रीय मंत्र्यांना मैदानात उतरविले आहे.

त्यातच आता अजित पवार गटानेही मुख्यमंत्री एकनाथ शिंदे यांच्या गटातील १३ खासदारांच्या मतदारसंघात मोर्चेबांधणी सुरू केल्याने सर्वांच्याच भूवया उंचावल्या आहेत. दरम्यान, अजित पवार यांच्या सरकारमध्ये एन्ट्रीनंतर शिंदे गटात नाराजी असल्याच्या चर्चा सुरू झाल्या होत्या.

आता अजित पवार यांनी शिंदे गटातील खासदारांच्या मतदारसंघात पक्षवाढीसाठी मोर्चेबांधणी सुरू केल्याने शिंदे गटातील नेत्यांमध्ये पुन्हा एकदा नाराजीचा सूर उमटण्याची शक्यता आहे. दरम्यान, मुख्यमंत्री एकनाथ शिंदे यांच्या खुर्चीवर दोन उपमुख्यमंत्री डोळा ठेवून असून हे गंमतजंमतचे सरकार आहे, अशी टोला काँग्रेस प्रदेशाध्यक्ष नाना पटोले यांनी लगावला आहे.

Edited by - Satish Daud