Covid 19 In Maharashtra: गेल्या काही दिवसांपासून देशासह राज्यात कोरोना रुग्णांच्या संख्येत झपाट्याने वाढ होत आहे. दिवसागणिक बाधित रुग्णांची संख्या वाढतच चालली आहे. मुंबईतील वाढत्या रुग्णसंख्येमुळे पुन्हा एकदा चिंतेत भर पडली आहे. राज्यात गुरूवारी दिवसभरात कोरोनाचे तब्बल १ हजार ११३ नवे रुग्ण आढळून आले आहेत. चिंताजनक बाब म्हणजे ३ रुग्णांचा मृत्यू देखील झाला आहे.  (Latest Marathi News)

मृत्युमुखी पडलेल्या रुग्णांमध्ये डोंबिवलीतील (Dombivali) एका रुग्णाचा समावेश आहे. या रुग्णाचे वय ८२ वर्षे होते. मार्च महिन्यात रुग्णाच्या मांडीच्या हाडाची शस्त्रक्रिया करण्यात आली होती. त्यानंतर १६ एप्रिल रोजी त्याला ताप आला. १७ एप्रिल रोजी उपचारासाठी खाजगी रुग्णालयात दाखल करण्यात आले होते. १९ एप्रिल रोजी त्याला उपचार करुन घरी सोडण्यात आले.

घरी गेल्यानंतर त्याला ह्रदयविकाराचा झटका आला. त्यात त्याचा मृत्यू झाला. त्याच्या वैद्यकीय अहवालात तो कोरोना पॉझिटीव्ह असल्याचे निष्पन्न झाले आहे. कोरोनाचा प्रादुर्भाव संपुष्टात आल्यानंतर पुन्हा कोरोना वाढत असताना डोंबिवलीत एकाचा कोरोनामुळे मृत्यू झाल्याने आरोग्य यंत्रणा पुन्हा जागी झाली आहे. (Breaking Marathi News)

दरम्यान, गेल्या २४ तासांत राज्यात आढळून आलेल्या १,११३ नवीन रुग्णांपैकी २०७ रुग्ण एकट्या मुंबईत आढळले आहेत. मुंबईत २२ मार्चपासून सक्रिय रुग्णांच्या वाढीचा आलेख उंचावला आहे. वर्षअखेरीस मे महिन्यात रुग्णांची संख्या आणखी वाढण्याची शक्यता आरोग्य विभागाने व्यक्त केली आहे.

सक्रिय रुग्णांची संख्या वाढून पाच ते सहा हजारच्या घरात जाण्याची भीती व्यक्त केली जात आहे. राज्याचा दैनंदिन सकारात्मकता दर ६% वर घसरला आहे. तर मुंबईचा ११% आहे. परिणामी राज्यात ६,१२९ कोरोना रुग्णसंख्या आहे तर शहरात १,५२४ सक्रिय कोरोना रुग्णसंख्या आढळून आली आहे.

दरम्यान, कोरोना रुग्णांची (Corona Cases) वाढती संख्या पाहता मुंबई महापालिकेचे आयुक्त इकबालसिंग चहल यांनी ६० वर्षांवरील ज्येष्ठ नागरिकांना मास्क वापरण्याचा सल्ला दिला आहे. याशिवाय मंत्री गिरीष महाजन यांनी वैद्यकीय महाविद्यालयातील डॉक्टर तसेच परिचारिकांना मास्क वापरण्याचा सल्ला दिला आहे. लहान मुले, गरोदर महिलांनी गर्दीच्या ठिकाणी जाणे टाळावे, असंही सरकारकडून सांगण्यात आलं आहे.

Edited by - Satish Daud