कुणाल कामराच्या गाण्याने नवा वाद पेटला आहे. कुणाल कामराने उपमुख्यमंत्री एकनाथ शिंदेंवर टीकात्मक गाणे तयार केल्याने शिवसैनिकांनी आक्रमक भूमिका घेतली आहे. शिंदेंच्या शिवसैनिकांनी काल कुणार कामराचा खारमधील स्टुडिओ फोडला होता. तसेच त्याच्याविरोधात पोलिसांतही तक्रार दिली. कुणाल कामराने सुपारी घेऊन एकनाथ शिंदेंची बदनामी केल्याचा आरोप महायुती आणि मुख्यमंत्र्यांनी आरोप केला आहे. आरोपानंतर मी सुपारी घेतली नाही. मी माफी मागणार नाही, असं म्हणत कुणाल कामराने वक्तव्यावर ठाम असल्याचे म्हटलं.

कुणाल कामराच्या वक्तव्याने राजकीय वर्तुळात आरोप-प्रत्यारोप सुरु झाला आहे. कामराने सुपारी घेऊन वक्तव्य केल्याचा आरोप मुख्यमंत्र्यांनी केला. त्यानंतर कुणाल कामराने प्रत्युत्तर दिलं आहे. मुंबई पोलिसांनी कुणाल कामराची फोनवरच प्राथमिक चौकशी केली. वक्तव्य मागे घेणार नसल्याचे कामराने पोलिसांना सांगितलं आहे. कोर्टाने सांगितल्यावर माफी मागेन असंही त्याने म्हटलं आहे.

'मी सुपारी घेतली नाही. बँक खाती तपासा, असं कामराने पोलिसांना सांगितलं. कामराच्या वक्तव्यानंतर पोलीस काय भूमिका घेतात, हे पाहावे लागणार आहे. दुसरीकडे कामराच्या विरोधात पोलिसांत तक्रार देखील नोंदवण्यात आल्या आहेत. कुणाल कामराच्या वक्तव्याविरोधात ठिकठिकाणी आंदोलन देखील होऊ लागले आहेत. अकोल्यातील शिवसैनिकांनी कामराच्या विरोधात घोषणाबाजी करून जोड मारो आंदोलन केले. कुणाल कामराचा शो झालेल्या खारमधील स्टुडिओची रविवारी शिवसैनिकांनी तोडफोड केली.

स्टुडिओवर कारवाई होणार?

खार पोलीस ठाण्याच्या हद्दीत बांधलेल्या स्टुडिओवर बीएमसीने पकड घट्ट केली आहे. महानगरपालिकेचे अधिकारी युनी कॉन्टिनेंटल स्टुडिओमध्ये दाखल झाले आहेत. स्टुडिओच्या बेकायदेशीर भागावर कारवाई होऊ शकते. महापालिका सहआयुक्त विनायक विसपुते घटनास्थळी पोहोचले आहेत. खारमधील याच स्टुडिओमध्ये स्टँड अप कॉमेडियन कुणाल कामराने वादग्रस्त गाणे गायले होते. स्टुडिओचा वीजपुरवठा देखील खंडित केला जाऊ शकतो. कारण अदानी इलेक्ट्रिसिटीशी संबंधित अधिकारीही घटनास्थळी पोहोचले होते.