Konkan Ganpati Special Train 2023: गणेशोत्सव अवघ्या काही आठवड्यांवर येऊन ठेपला असून कोकणात जाण्यासाठी चाकरमान्यांनी रेल्वेतिकिटं बुकिंग करण्यास सुरूवात केली आहे. अनेक गाड्या फुल्ल झाल्याने प्रवाशांची तिकीटं वेटिंगवर पडली आहेत. त्यामुळे अडचणी निर्माण होत असून मोठ्या गर्दी होण्याची शक्यता आहे. हीच बाब लक्षात घेता, आता रेल्वेने एक मोठा निर्णय घेतला आहे. (Latest Marathi News)

कोकणात जाणाऱ्या (Kokan News) चाकरमान्यांची अतिरिक्त गर्दी लक्षात घेऊन रेल्वेने कोकण, मुंबई-मडगाव आणि मुंबई-सावंतवाडी रोड या गाड्यांच्या एकूण २२ फेऱ्यांना प्रत्येकी दोन डबे जोडण्याचा निर्णय घेतला आहे. रेल्वेच्या या निर्णयामुळे कोकणात जाणाऱ्या विशेष एक्स्प्रेसमधील वेटिंग लिष्टवर असलेल्या प्रवाशांना मोठा दिलासा मिळणार आहे.

रेल्वे प्रशासनाने (Railway) गणेशोत्वानिमित्त कोकणात जाणाऱ्यांसाठी सीएसएमटी-मडगाव आणि सीएसएमटी-सावंतवाडी रोड या दोन गणपती विशेष ट्रेनची घोषणा केली होती. या रेल्वेगाड्यांच्या प्रत्येकी २२ फेऱ्या चालवण्यात येणार आहे. या गाड्यांचे आरक्षणही हाऊसफुल्ल झाले आहे.

मात्र, प्रवाशांची वाढती मागणी आणि शेकडोंपार गेलेली वेटिंग लिष्ट लक्षात घेता, प्रत्येक गाडीला शयनयान श्रेणीचे अतिरिक्त दोन डबे जोडण्याचा निर्णय घेण्यात आला आहे. त्यामुळे या दोन्ही गाड्यांची डब्याची संख्या २० वरून २२ डब्यावर पोहचणार आहे.

या २० शयनयान श्रेणीचे डबे आणि दोन डबे सीटींग कम लगेज या श्रेणीतील असणार आहे. आता या दोन्ही रेल्वे गाड्यांचा सुधारित संरचनेनुसार उत्सव विशेष फेऱ्या एलएचबी रेल्वेगाड्याऐवजी आयसीएफ रेल्वेगाडीमध्ये धावणार आहे. दरम्यान, या गाड्यांचे आरक्षण केलेल्या प्रवाशांनी आपले तिकीट तपासून पुढील नियोजनाला सुरूवात करावी, असे आवाहन रेल्वेकडून करण्यात आले आहे.

Edited by - Satish Daud