संघर्ष गांगुर्डे, कल्याण

मागील महिन्यात महानगरपालिकेच्या निवडणूका पार पडल्या. महापौर खुर्चीच्या चढाओढीच्या स्पर्धेत पुन्हा महायुतीनेच बाजी मारली. मुंबई, पुणे, ठाणे, कल्याण डोंबिवली महानगर पालिकेत शिवसेना आणि भाजपची जोरदार लढत रंगली. मुंबई महानगरपालिकेचा महापौर पदाचा दावेदार अद्याप निश्चित झाला नसला तरी कल्याण डोंबिवली महानगरपालिकेचा महापौर ठरला आहे. मात्र कल्याण डोंबिवली महानगरपालिकेच्या महापौर निवासस्थानाची दुरवस्था पुन्हा एकदा चर्चेत आली आहे.

२०१० साली जनतेचे लाखो रुपये खर्च करून हे महापौर निवासस्थान बांधण्यात आले होते. मात्र, रस्त्यांच्या वादग्रस्त कारणांमुळे हे निवासस्थान सुरुवातीपासूनच चर्चेत राहिले. बांधकामानंतर अनेक वर्षे हा बंगला वापराविना ओस पडून होता.यानंतर पुन्हा लाखो रुपये खर्च करून बंगल्याची डागडुजी करण्यात आली.

मात्र, तत्कालीन महापौरांनी केवळ बंगल्याची पूजा करून त्यामध्ये वास्तव न करण्याचा निर्णय घेतला. त्यामुळे पुन्हा एकदा हा बंगला वापरात आला नाही. कोरोना काळापासून तर हा बंगला पूर्णपणे बंद अवस्थेत असून, देखभालीअभावी त्याची अवस्था अधिकच बिकट झाली आहे. सध्या बंगल्यातील संपूर्ण लाकडी फर्निचर खराब झाले असून, अनेक ठिकाणी वाळवीचा प्रादुर्भाव झाल्याचे दिसून येत आहे. नियमित देखभाल व संरक्षण न केल्यामुळे महापौर निवासस्थानाची मोठ्या प्रमाणावर नासधूस झाली आहे.

केडीएमसी प्रशासनाने या बंगल्याकडे सातत्याने दुर्लक्ष केल्याने पुन्हा एकदा दुरुस्तीसाठी जनतेच्या लाखो रुपयांची उधळपट्टी होण्याची शक्यता व्यक्त केली जात आहे. दरम्यान, नवनिर्वाचित महापौर हर्षाली थविल यांनी पालिका अधिकाऱ्यांसह या निवासस्थानाची पाहणी केली आहे. पाहणीनंतर या बंगल्याच्या दुरुस्तीसाठी पुन्हा निधी खर्च करावा लागणार असल्याचे संकेत मिळत आहेत. त्यामुळे प्रशासनाच्या निष्काळजीपणामुळे जनतेच्या पैशांचा अपव्यय होत असल्याचा आरोप नागरिकांकडून केला जात आहे.