अभिजीत देशमुख, साम टीव्ही

केडीएमसीच्या अनधिकृत इमारतींवर मनपा कायदेशीर कारवाई करत असताना नागरिकांच्या राहण्याचा प्रश्न ऐरणीवर आलाय. न्यायालयाच्या आदेशानंतर केडीएमसी क्षेत्रातील त्या ६५ इमारतींवर कारवाईची टांगती तलवार आहे. संबंधित रहिवाशांना इमारात रिकामी करण्याच्या सूचना देण्यात आल्या आहेत.

या प्रकरणी शिवसेना ठाकरे गटाने बेघर कुटुंबांना पाठिंबा दर्शवलाय. 'साडे सहा हजार कुटुंबांना बेघर होऊ देणार नाही, त्यांच्या घरांवर कारवाई होऊ देणार नाही', असं ठाकरे गटाचे कल्याण जिल्हा प्रमुख दीपेश म्हात्रे म्हणालेत.

इमारतींमधील रहिवाशांचा मेळावा आणि पत्रकार परिषद घेत ठाकरे गटाचे कल्याण जिल्हा प्रमुख दीपेश म्हात्रे यांनी बेघर कुटुंबाला पाठिंबा दर्शवला आहे. 'घरांवर कारवाई होऊ देणार नाही. या प्रकरणी आदित्य ठाकरेंसह उद्धव बाळासाहेब ठाकरे पक्षाचे पदाधिकारी, मुख्यमंत्री देवेंद्र फडणवीस यांची भेट घेणार आहोत', असे ठाकरे गटाचे कल्याण जिल्हा प्रमुख दीपेश म्हात्रे यांनी सांगितलंय.

'ज्यांची फसवणूक झाली त्यांच्यावर कारवाई, मात्र ज्यांनी फसवणूक केली त्यांच्यावर कारवाई नाही, हा कोणता न्याय?; असा सवालही म्हात्रे यांनी उपस्थित केलाय. 'ज्या कथित बिल्डरांवर गुन्हा दाखल झाले ते बिल्डर नाहीत, सूत्रधार दुसरेच आहेत, खोटे कागदपत्र बनवले, खोटे कागदपत्रांच्या आधारे रजिस्ट्रेशन केलं. शासनाचे फसवणूक केली. मात्र, याप्रकरणी खोटी कागदपत्र बनणार्‍यांवर कोणतीही कारवाई झालेली नाही.

'या प्रकरणात ६५ बिल्डरांची यादी दिली ते खरे बिल्डर नाही, डमी उभे केले आहेत, या यादीत प्रत्यक्ष त्या बांधकाम साइटवर काम करणारे इलेक्ट्रिशन, प्लंबर, लेबर यांची नावे आहेत. त्यांची बांधकाम व्यवसायाची कोणतीही पार्श्वभूमी नाही. हे मोठे रॅकेट आहे ,या रॅकेटला राजकीय वरदहस्त आहे. ते उघड झालेच पाहिजे, अशी मागणी म्हात्रे यांनी केली आहे.

'या रहिवाशांच्या पाठीशी शिवसेना बाळासाहेब ठाकरे पक्ष खंबीरपणे उभा राहील या लोकांवर कोणतीही कारवाई होऊ नये यासाठी रस्त्यावर उतरून लढाई लढू, त्याच बरोबर न्यायालयीन लढाई देखील लढू', असा इशाराही म्हात्रे यांनी दिला आहे.