अभिजीत देशमुख, साम टीव्ही

कल्याणमध्ये अनधिकृत कामांचा सुळसुळाट पाहायला मिळत आहे. कल्याणमधील गांधारी खाडीपात्रात अतिक्रमण करण्यात आल्याचा बाब उघडकीस आली आहे. या पात्रात भराव टाकून अनधिकृत बांधकाम सुरु असल्याचं समोर आलं आहे. या धक्कादायक प्रकारानंतर आमदार विश्वनाथ भोईर यांनी आक्रमक भूमिका घेतली आहे. आमदार विश्वनाथ भोईर यांनी अनधिकृत बांधकामावर कारवाई करण्याची मागणी केली आहे.

कल्याण गांधारी परिसरात आमदार विश्वनाथ भोईर यांनी गांधारी खाडी किनारी असलेल्या धोकादायक परिसराची पाहणी केली. या पाहणीदरम्यान खाडी पात्रात भराव टाकून खाडीचे पात्र अरुंद करण्यात आल्याचे धक्कादायक वास्तव समोर आले आहे. अनधिकृत भराव टाकून बांधकाम करणाऱ्यावर कारवाई करण्यासाठी आमदार भोईर तक्रार करणार असल्याचे सांगितले.

अनधिकृत अतिक्रमण करणाऱ्या व्यक्तीला राजकीय वरदहस्त असल्याने त्याची मजल वाढत असेल तर त्याला पाठीशी घातले जाणार नसल्याचे आमदार विश्वनाथ भोईर यांनी सांगितले आहे. गांधारी पुलावरील अपघातप्रकरणी पोलिसांची भूमिका संशयास्पद आहे. दोन दिवसांत गुन्हा न दाखल झाल्यास कारवाईची चेतावणी आमदार भोईर यांनी दिली.

कल्याण-पडघा मार्गावरील गांधारी पुलावर झालेल्या भीषण अपघातप्रकरणी पोलिसांनी डंपर चालकाला एका दिवसातच जामीनावर सोडल्याने, पोलिसांची भूमिका संशयास्पद असल्याचा ठपका आमदार विश्वनाथ भोईर आणि आमदार शांताराम मोरे यांनी ठेवला आहे.

घटनास्थळी पाहणी करून त्यांनी पोलिसांवर गंभीर आरोप केले आहेत. दोन दिवसांत कारवाई न झाल्यास संबंधित अधिकाऱ्यांची गडचिरोलीला बदली करण्याची मागणीही आमदार भोईर यांनी केली आहे . कल्याणमध्ये पुन्हा अनधिकृत बांधकाम आढळल्याने राजकीय वर्तुळात चर्चांना उधाण आलं आहे.