Summary -

• कल्याण पूर्वच्या बिर्ला कॉलेज परिसरात कामगाराला विजेचा झटका बसून मृत्यू झाला.

• संदीप चौधरी हा KDMC च्या ठेकेदाराकडे पथदिवे दुरुस्तीचं काम करत होता.

• हाय टेन्शन वायरला स्पर्श झाल्याने ही घटना घडली.

• कामगाराच्या मृत्यूमुळे कंत्राटी कामगारांच्या सुरक्षिततेचा प्रश्न ऐरणीवर आहे.

संघर्ष गांगुर्डे, कल्याण

कल्याणमध्ये भयंकर घटना घडली. पथदिवे दुरुस्त करताना हाय टेन्शन वायरचा झटका लागून कामगाराचा मृत्यू झाला. कल्याण पूर्वच्या बिर्ला कॉलेज परिसरात ही घटना घडली. या घटनेमुळे परिसरात एकच खळबळ उडाली. या घटनेची माहिती मिळताच पोलिसांनी घटनास्थळी धाव घेत तपास सुरू केला. मृत कामगार हा खासगी ठेकेदाराकडे काम करत असल्याची माहिती समोर आली आहे.

मिळालेल्या माहितीनुसार, ​कल्याण पश्चिमेकडील बिर्ला कॉलेज परिसरात आज दुपारच्या सुमारास ही घटना घडली. पथदिवे बंद झाल्यामुळे त्याच्या दुरूस्तीचे काम करण्यासाठी आलेल्या कामगाराचा विजेचा धक्का लागून मृत्यू झाला. दुरूस्तीचे काम करत असताना हाय टेन्शन वायरला स्पर्श झाल्यामुळे ही घटना घडली. संदीप चौधरी असं मृत्यू झालेल्या कामगाराचे नाव होते. संदीपच्या मृत्यूमुळे कुटुंबीयांना मोठा धक्का बसला.

संदीप चौधरी हा कल्याण- डोंबिवली महापालिकेच्या (KDMC) खासगी ठेकेदाराकडे कामगार म्हणून काम करत होता. नेहमीप्रमाणे तो आज काम करण्यासाठी सकाळी घराबाहेर पडला. पण काम करत असताना त्याला विजेचा जोरदार झटका लागला आणि त्याचा मृत्यू झाला. या घटनेमुळे परिसरात काही काळ गोंधळाचे वातावरण होते. घटनेची माहिती मिळताच पोलिसांनी घटनास्थळी धाव घेत कामगाराचा मृतदेह ताब्यात घेऊन शवविच्छेदनासाठी रुग्णालयात पाठवला.

संदीप चौधरीच्या मृत्यूमुळे त्याच्या कुटंबीयांना मोठा धक्का बसला. संदीपच्या घरची परिस्थिती हालाकीची आहे. तो घरातील एकच कमावता व्यक्ती होता. पथदिवे आणि विविध विद्युत उपकरणांच्या दुरुस्तीचे काम करणाऱ्या खासगी कर्मचाऱ्याच्या मृत्यूमुळे कंत्राटी कामगारांच्या सुरक्षिततेचा प्रश्न ऐरणीवर आला आहे. सध्या कल्याण पोलिस या घटनेचा तपास करत आहेत.