संघर्ष गांगुर्डे, साम टिव्ही

कल्याण स्थानक परिसरातील प्रसिद्ध स्कायवॉक प्रवाशांसाठी मोठी डोकेदुखी ठरत आहे. पूर्व - पश्चिमला जोडणाऱ्या या पुलामुळे नागरिक आता त्रस्त झाले आहेत. स्कायवॉकवर फेरीवाले, भिकारी, तृतीयपंथी आणि गर्दुल्ल्यांनी अड्डा मांडला आहे. यामुळे नागरिकांना रहदारी करताना नाहक त्रास सहन करावा लागत आहे. मुख्य म्हणजे या पुलावर वेश्याव्यवसाय करणारे महिला देखील असतात. यामुळे काही महिला नागरिकांना असुरक्षितता वाटते.

या स्कायवॉकवरून हजारो प्रवासी प्रवास करतात. मात्र, अस्वच्छता, बेकायदेशीर व्यवसाय आणि असुरक्षित वातावरणामुळे प्रवाशांना प्रचंड गैरसोयीचा सामना करावा लागतो. या संपूर्ण प्रकाराकडे महापालिका प्रशासनासह पोलीस प्रशासनाचे दुर्लक्ष झाल्याचा आरोप नागरिकांनी केला आहे.

पालिका आणि पोलिस प्रशासनाच्या साटंलोट्यामुळे स्कायवॉक गोरखधंद्यांचा अड्डा बनला असल्याचा आरोपही कल्याणकरांनी केला आहे. प्रवाशी नागरिकांनी याचा विरोध केल्यानंतर त्यांना फेरीवाल्याच्या रोषाला सामोरे जावे लागते. अशा अनेक घटना या ठिकाणी घडल्या आहे. त्यामुळे प्रवाशी घाबरून यावर काही भाष्य करण्यास तयार होत नाहीत.

मुख्य म्हणजे दिवसाढवळ्याही वेश्याव्यवसाय करणाऱ्या महिलाही या स्कायवॉकवर दिसून येतात. यामुळे पुरूषांसह महिलांनाही असुरक्षित वाटते. प्रवाशांना पुलावरून जाताना नाहक त्रास सहन करावा लागतो. याचे अनेक व्हिडिओही सोशल मीडियात व्हायरल झाले आहेत. आता या समस्येतून नागरिकांची सुटका कधी होणार? हा मोठा प्रश्न कल्याणकरांसमोर उभा राहिला आहे.