संघर्ष गांगुर्डे, साम टीव्ही

राज्यातील अपघातांचं सत्र थांबेना झालं आहे. कल्याणमध्ये भरदुपारी भीषण अपघाताचा थरार घडला. कल्याणमध्ये शुक्रवारी दुपारी दोन भरधाव वाहनांची धडक झाली. या धडकेत दुचाकीस्वाराचा जागीच मृत्यू झाला. या अपघाताने रस्त्यावर काही क्षणासाठी एकच खळबळ उडाली. दुचाकीस्वाराचा मृत्यू झाल्यानंतर रस्त्यावरील वाहनधारकांनी हळहळ व्यक्त केली.

कल्याण पश्चिम गोविंदवाडी बायपास परिसरात शुक्रवारी दुपारी भीषण अपघात झाला. या अपघातात ४५ वर्षीय दुचाकी चालक प्रकाश पाटील यांचा जागीच मृत्यू झाला. तर त्यांच्या पत्नी पत्नी प्रिया पाटील गंभीर जखमी झाल्या. जखमी प्रिया पाटील यांना तातडीने रुग्णालयात दाखल करण्यात आलं.

कसा झाला अपघात?

कल्याणमधील पत्रीपूल–दुर्गाडी–गोविंदवाडी रोडवर सुरू असलेल्या रस्त्याच्या कामामुळे वाहतूक एका बाजूने सुरू होती.याचदरम्यान ट्रक आणि दुचाकीमध्ये जोरदार धडक होऊन अपघात झाला. अपघातानंतर वाहतूक पोलीस आणि स्थानिक पोलीस तात्काळ घटनास्थळी दाखल झाले.

जखमी प्रिया पाटील यांना जवळील शासकीय रुग्णालयात दाखल करत तातडीने उपचार सुरु केले. मयत प्रकाश पाटील हे कल्याण पश्चिमेतील वाडेघर परिसरातील रहिवासी होते. पत्नीला कामावरून घरी घेऊन येताना हा अपघात झाल्याची माहिती मिळते.

रस्त्याच्या कामामुळे वर्दळीच्या मार्गावर निर्माण झालेल्या अडचणींमुळे हा अपघात झाल्याची प्राथमिक माहिती हाती आली आहे. या प्रकरणी पोलिसांनी ट्रकचालकाचा शोध घेऊन पुढील तपास सुरू केला आहे. या कल्याणमधील या अपघातामुळे रस्ते वाहतुकीच्या सुरक्षेबद्दल प्रश्नचिन्ह उपस्थित करण्यात येत आहे.