अभिजित देशमुख, साम टीव्ही

कल्याणच्या कोळशेवाडी परिसरातून एक धक्कादायक प्रकार समोर आला आहे. क्लासवरून रिक्षाने घरी परतणाऱ्या एका अल्पवयीन विद्यार्थिनीची रिक्षाचालकाने छेड काढली. त्यामुळे विद्यार्थिनी प्रचंड घाबरली. तिने थेट धावत्या रिक्षातून उडी मारत घरच्या दिशेने पळ काढला. मात्र, तरीही मुजोर रिक्षाचालकाने तिचा पाठलाग करून शिवीगाळ केली. याप्रकरणी कोळशेवाडी पोलीस ठाण्यात रिक्षाचालकाविरोधात गुन्हा दाखल करण्यात आलाय.

गुन्हा दाखल होताच पोलिसांनी (Police) त्याला अटकही केली आहे. गोपाळ मुदलीयार असं अटक करण्यात आलेल्या आरोपीचे नाव आहे. पोलिसांनी दिलेल्या माहितीनुसार, कल्याण पूर्व येथून एका अल्पवयीन मुलीने क्लासहून घरी जाण्यासाठी रिक्षा पकडली. रिक्षामध्ये बसताच रिक्षा चालकाने मुलीकडे नंबर मागितला.

इतकंच नाही तर त्याने विद्यार्थिनीची छेड (Crime) देखील काढली. रिक्षाचालकाचं कृत्य पाहून विद्यार्थिनीने त्याला रिक्षा थांबवण्यास सांगितली. मात्र, तरीही आरोपीने सुसाट वेगाने रिक्षा चालवली. तेव्हा विद्यार्थिनीने थेट धावत्या रिक्षातून उडी मारली आणि घराच्या दिशेने पळ काढला.

यानंतरही रिक्षाचालकाने विद्यार्थिनीचा पाठलाग सुरूच ठेवला. त्याने तिच्या घरापर्यंत जाऊन शिवीगाळ केली. घडलेला प्रकार मुलीने आपल्या आई-वडिलांना सांगितला. त्यांनी तातडीने पोलिसांत धाव घेत तक्रार दाखल केली. याप्रकरणी कोळशेवाडी पोलिसांनी आरोपीवर गुन्हा दाखल केला असून त्याला अटकही करण्यात आली आहे. या घटनेनं परिसरातून संताप व्यक्त होत आहे.