संघर्ष गांगुर्डे, साम टीव्ही

कल्याणमध्ये अनैतिक संबंधातून निर्माण झालेल्या वादातून एका महिलेची हत्या करून नेपाळला पळून जाण्याच्या तयारीत असलेल्या आरोपीला कल्याणच्या खडकपाडा पोलिसांनी झारखंडमधून अटक केली आहे. विशेष म्हणजे पोलिसांना अवघा वीस मिनिटांचा उशीर झाला असता तर आरोपी नेपाळमध्ये फरार झाला असता, अशी माहिती पोलिसांनी दिली.

27 एप्रिल रोजी कल्याण पश्चिमेतील एका घरात गुड्डू देवी या महिलेला गंभीर जखमी अवस्थेत रुग्णालयात दाखल करण्यात आले होते. तपासात गुड्डू देवी आणि आरोपी बम बम कुमार यांच्यात प्रेमसंबंध असल्याची माहिती समोर आली. मात्र काही दिवसांपासून गुड्डू देवी यांनी आरोपीशी बोलणे बंद केल्याने बम बम कुमार संतापला होता. याच रागातून आरोपी बम बम कुमार हा गुड्डू देवी यांच्या घरी गेला. दोघांमध्ये वाद झाल्यानंतर त्याने गुड्डू देवी यांचे डोके भिंतीवर आपटून त्यांना गंभीर जखमी केले आणि त्यानंतर तो झारखंडला पळून गेला.

रुग्णालयात उपचार सुरू असताना 11 मे रोजी गुड्डू देवी यांचा मृत्यू झाला.या प्रकरणी खडकपाडा पोलिस ठाण्यात गुन्हा दाखल करण्यात आला. आरोपीने मोबाईल बंद केल्याने त्याचा माग काढणे पोलिसांसमोर आव्हान होते. पोलिसांनी नातेवाईकांच्या मदतीने आरोपीच्या मूळ गावाचा पत्ता शोधून काढला. डीसीपी अतुल झेंडे एसीपी अशोक होनमाने आणि वरिष्ठ पोलिस निरीक्षक अमर वाघमोडे यांच्या मार्गदर्शनाखाली विशेष पथक झारखंडमधील गोंडा जिल्ह्यात दाखल झाले.

स्थानिक पोलिसांच्या मदतीने आरोपीला ताब्यात घेण्यात आले. चौकशीत आरोपी नेपाळला पळून जाण्याच्या तयारीत असल्याची माहिती समोर आली. पोलिसांनी वेळीच कारवाई करत त्याला अटक केली. आरोपी बम बम कुमार याला कल्याण न्यायालयात हजर केले असता न्यायालयाने त्याला चार दिवसांची पोलिस कोठडी सुनावली आहे. या प्रकरणाचा पुढील तपास पोलिस अधिकारी भूषण देवरे करत आहेत. धक्कादायक बाब म्हणजे मृत गुड्डू देवी यांना दोन मुले असून आरोपी बम बम कुमार यालाही एक मुलगी आहे. तसेच दोघांच्या प्रेमसंबंधांची माहिती नातेवाईकांनाही असल्याचे तपासात उघड झाले आहे.