संघर्ष गांगुर्डे, कल्याण

गणेशोत्सव संपताच आता राज्यभर नवरात्रीचा उत्साहाची तयारी सुरू झाली आहे. नवरात्री उत्सवाची कल्याण मधील ऐतिहासिक दुर्गाडी किल्ल्यावर दरवर्षी लाखो भाविकांचा लोंढा उसळतो. यंदाही या दुर्गा माता मंदिरात नवरात्रीच्या उत्सवाची जय्यत तयारी सुरू आहे. यासाठी गेल्या ५० वर्षापासून याचे नियोजन दुर्गाडी समिती आणि शिवसेना पदाधिकारी सांभाळतात याच पार्श्वभूमी वर शिवसेनेचे माजी नगरसेवक आणि पदाधिकारी किल्ल्यावर पाहणी करून महत्त्वाची बैठक घेतली असून, भाविकांसाठी विशेष सुविधा देण्याचं नियोजन करण्यात आलं आहे.

कल्याणमधील ऐतिहासिक दुर्गाडी किल्ल्यावर नवरात्रीचा जल्लोष रंगण्यासाठी जोरदार तयारी सुरू झाली आहे. नवरात्र उत्सव समिती अध्यक्ष , पदाधिकारी आणि स्थानिक नेतेमंडळींनी किल्ल्याची पाहणी करून नवरात्री नियोजनाची महत्त्वाची बैठक घेतली.गेल्या पन्नास वर्षांपूर्वी किल्ल्यावरची बंदी मोडून शिवसेनेने दुर्गा माता मंदिरात नवरात्री महोत्सव सुरू केला होता.

त्यानंतर दरवर्षी मोठ्या थाटामाटात आणि भक्तीभावात हा उत्सव पार पडतो. नवरात्रीत दररोज हजारो भाविक दर्शनासाठी किल्ल्यावर हजेरी लावतात. गेल्या काही वर्षांत हा आकडा पाच लाखांपेक्षा अधिक झाला आहे. या प्रचंड गर्दीचं नियोजन, सुरक्षा, वाहतूक आणि सुविधा याची जबाबदारी दुर्गाडी समिती आणि शिवसेना पदाधिकारी सांभाळतात. यंदाही एकनाथ शिंदे यांच्या नेतृत्वाखालील शिवसेना भाविकांसाठी सुविधा उपलब्ध करून देणार आहे.

दर्शन रांगा व्यवस्थित ठेवण्यासाठी विशेष व्यवस्था ,पिण्याच्या पाण्याची सोय,वैद्यकीय मदत केंद्र,वाहतूक नियंत्रणासाठी पोलिसांसोबत समन्वय आज झालेल्या बैठकीत या सर्व बाबींवर चर्चा करून तयारीला वेग देण्यात आला. कल्याणकरांसाठी दुर्गाडी किल्ल्यावरील नवरात्री महोत्सव हा भक्ती, परंपरा आणि जल्लोषाचा संगम ठरणार आहे.