स्वतःच घर घेणं हे प्रत्येकाचं स्वप्न असतं. महागाईच्या या जमान्यात हे स्वप्न बंदिस्त पेटाऱ्यात राहतं. मात्र काबाडकष्ट करून काही जण आपल्या स्वप्नांची पूर्तती करतात. अशातच तुम्हाला जर समजलं तुमचं घर अनधिकृत जागेवर राहत आहात तर? अशीच घटना डोंबिवलीतील रहिवाशांसोबत घडली आहे. डोंबिवली पश्चिमेकडील गणेशनगर आणि भगवान काटेनगर परिसरातील सुमारे २०९ घरांना रेल्वेच्या जागेवर अतिक्रमण केल्याचं कारण देत रेल्वेकडून संबंधित रहिवाशांना नोटीसा बजावण्यात आल्या आहेत. या घटनेने रहिवाशांमध्ये भीतीचे वातावरण निर्माण झाले आहे.

उच्च न्यायालयाने कल्याण डोंबिवली पालिकेला डोंबिवलीतील ६५ इमारती जमीनदोस्त करण्याचा आदेश दिल्यानंतर आता डोंबिवली पश्चिमेकडील गणेशनगर आणि भगवान काटेनगर परिसरातील सुमारे २०९ घरांना रेल्वे प्रशासनानं कारवाईच्या नोटिसा बजावल्या आहेत. रेल्वेच्या जागेवर अतिक्रमण केल्याचा ठपका ठेवत रहिवाशांना या नोटिसा देण्यात आल्या आहेत. यामुळं रहिवाशांच्या पायाखालची जमीन सरकली असून, त्यांच्यामध्ये भीतीचं वातावरण निर्माण झाले आहे.

या प्रकरणी नोटिसा मिळाल्यानंतर रहिवाशांनी तीव्र संताप व्यक्त केला आहे. "आम्ही आमच्या जीवनभराची पुंजी घालून घरं विकत घेतली आहेत, पालिकेत नियमित करही भरतो," असं त्यांचं म्हणणं आहे. मात्र, त्यांची फसवणूक झाली असून, त्यांनी कोणतंही अतिक्रमण केलेलं नाही, असा दावा रहिवासी करत आहेत.

रहिवाशी म्हणाले "२०१२-१३ पासून विकासकाकडून पैसे भरून ही घरं विकत घेतली आहेत आणि त्यांच्याकडे सर्व कायदेशीर कागदपत्रं आहेत. त्यामुळे, आम्ही कोणतंही अतिक्रमण केलेलं नसून, विकासकाने आमची फसवणूक केली आहे," असा या रहिवाशांचा आरोप असून या गंभीर समस्येकडं सरकारनं तातडीनं लक्ष द्यावं, अशी मागणी रहिवाशांनी केली आहे.

तसेच "आम्हाला बेघर करू नका, आमचं पुनर्वसन करा किंवा योग्य मोबदला द्या, अन्यथा कुटुंबांसह रस्त्यावर उतरून मोर्चा काढू" अशी मागणी करत रहिवाशांनी सरकारला इशाराही त्यांनी दिला आहे. दरम्यान डोंबिवलीत एकापाठोपाठ एक येणाऱ्या अशा अनाधिकृत बांधकामांच्या प्रश्नांमुळं हजारो कुटुंबांच्या डोक्यावर बेघर होण्याचं संकट उभं राहिलं आहे.