संघर्ष गांगुर्डे, साम टीव्ही

कल्याण डोंबिवली महानगरपालिकेने सोलर क्षेत्रात महत्वाच पाऊल टाकलंय. पालिकेच्या विद्युत विभागाच्या पुढाकाराने कल्याण डोंबिवलीतील पहिल्या अत्याधुनिक सोलर हायमास्टचे लोकार्पण करण्यात आलं. कल्याण पश्चिमेच्या गणपती चौकात हे लोकार्पण करण्यात आलं.

पालिकेच्या विद्युत विभागाच्या पाठपुराव्याने 7.5 लाख किमतीची ही हायमास्ट फिटिंग फिलिप्स कंपनीकडून मोफत उपलब्ध करून देण्यात आलीये. फिलिप्स इंडियाकडून सोलर हायमास्ट प्रायोगिक तत्त्वावर केडीएमसीला उपलब्ध करून देण्यात आलाय.

वीज पुरवठा खंडित किंवा तांत्रिक बिघाड झाल्यानंतर शहर अंधारात बुडून जातं. त्यावेळी रस्त्यावर चालणाऱ्या नागरिकांच्या सुरक्षेचा प्रश्न निर्माण होता. अंधाराचा गैरफायदा घेऊन काही गैरकृत्य झाल्याच्या घटना अनेकदा समोर आल्यात. मात्र, सोलर हायमास्टमुळे या गैरकृत्यांना आळा बसणार आहे. तसेच शहर अंधारमय होणार नाही, असा विश्वास यावेळी विद्युत आणि यांत्रिकी विभागाचे अतिरिक्त अभियंता प्रशांत भागवत यांनी व्यक्त केलाय.

नेहमीच्या सोलर हायमास्टपेक्षा या दिव्यांचा उजेडही अधिक जास्त आहे. इतकेच बॅटरी एकदा पूर्ण चार्ज झाल्यावर दोन दिवस हे दिवे सुरू राहू शकतील, अशी माहिती दिली. या हाय मास्टचा अभ्यास करून टप्प्याटप्प्याने संपूर्ण कल्याण डोंबिवलीमध्ये बसवण्यात येणार आहेत. यामुळे नागरिकांची सुरक्षिततेसोबतच वीज बचतही होऊ शकणार आहे. लोकार्पणावेळी विद्युत विभागाचे कार्यकारी अभियंता जितेंद्र शिंदे, उपकार्यकारी अभियंता भागवत पाटील आणि फिलिप्स इंडियाचे प्रमुख अधिकारी उपस्थित होते.