संघर्ष गांगुर्डे, साम टीव्ही

कल्याण : कल्याण पश्चिमेतील सिंडिकेट परिसरात एक धक्कादायक घटना घडली आहे. जिमला जाण्यासाठी रॅपिडो मोटरसायकल बुक केलेल्या एका तरुणीवर रॅपिडो बाईक चालकाने अतिप्रसंग करण्याचा प्रयत्न केल्याची घटना समोर आली आहे.

प्राथमिक माहितीनुसार, संबंधित तरुणी कल्याण पश्चिमेतून जिमकडे जात होती. सिंडिकेट परिसरातील पोलीस लाईनजवळ पोहोचल्यानंतर, बाईक चालकाने तिला अंधाऱ्या ठिकाणी नेले. त्या ठिकाणी त्याने तरुणीवर अतिप्रसंग करण्याचा प्रयत्न केला. आरोपीकडे मिरची स्प्रे आणि चाकू असल्याची माहितीही समोर आली आहे.

प्रसंगावधान राखत तरुणीने प्रतिकार केला आणि स्वतःची सुटका करून तेथून पळ काढला. घटनेची माहिती मिळताच स्थानिक नागरिकांनी तात्काळ हस्तक्षेप करत आरोपी रॅपिडो चालकाला पकडून चोप दिला.

घटनेनंतर परिसरात एकच खळबळ उडाली असून, महिलांच्या सुरक्षेचा प्रश्न पुन्हा ऐरणीवर आला आहे. घटनेची माहिती पोलिसांना देण्यात आली असून, पुढील तपास सुरू असल्याची माहिती सूत्रांकडून मिळत आहे. रॅपिडो कंपनीकडून चालकाची पडताळणी व सुरक्षेबाबतच्या उपाययोजनांवरही प्रश्न उपस्थित केले जात आहेत.

...अन् स्थानिकांनी दिला रॅपिडो चालकाला चोप

कल्याणच्या सिंधुगेट परिसरामध्ये पोलीस लाईन आहे.याच पोलीस लाईनमध्ये बाईकवरून हा रॅपिडो चालक तरुणीला अंधारात घेऊन चालला होता. त्यानंतर अंधारात गाडी थांबवल्यानंतर तिच्यावर अतिप्रसंग करण्याचा प्रयत्न केला. त्याच्याजवळ मिरची स्प्रे ,चाकू असे हत्यार होते. पीडित मुलीने स्वतःची सुटका करत पळ काढला. त्यानंतर स्थानिकांच्या तावडीत सापडलेल्या रॅपिडो चालकाला स्थानिक नागरिकांनी चोप दिला.