आगामी स्थानिक स्वराज्य संस्थांच्या निवडणुकांची चाहूल लागताच राज्यात राजकीय वारे वेगाने वाहू लागले आहेत. अशातच जळगावातील रावेर तालुक्यात राष्ट्रवादी काँग्रेस शरदचंद्र पवार गटाला मोठं खिंडार पडलं आहे. माजी आमदार अरुण पाटील यांनी आपल्या समर्थक पदाधिकारी आणि कार्यकर्त्यांसह भाजपमध्ये प्रवेश केला आहे. भाजपमधील प्रमुख नेत्यांच्या उपस्थितीत हा पक्षप्रवेश सोहळा पार पडला. या पक्षप्रवेशामुळे भाजपची ताकद वाढली असल्याची चर्चा आहे.

आज मुंबईतील भाजप मुख्यालयात पक्षप्रवेश सोहळा पार पडला. रावेर येथील माजी आमदार अरूण पाटील यांनी राष्ट्रवादी काँग्रेस शरद पवार गटाला जय महाराष्ट्र केला होता. आज त्यांनी भाजपचं कमळ हाती घेतलं. भाजप प्रदेशाध्यक्ष रविंद्र चव्हाण यांच्या प्रमुख उपस्थितीत हा पक्षप्रवेश सोहळा पार पडला. गेल्या काही दिवसांपासून अरूण पाटील राष्ट्रवादी काँग्रेस शरदचंद्र पवार गटाला सोडचिठ्ठी देणार असल्याची चर्चा होती. मात्र, आज त्यांनी राजीनामा दिल्यानंतर भाजप पक्षात प्रवेश केला.

अरूण पाटील यांच्यासह पदाधिकारी आणि कार्यकर्त्यांनी भाजपची साथ दिली. यावेळी राष्ट्रवादी (श.प) गटाचे जिल्हा परिषद माजी अध्यक्ष मुरलीधर तायडे, माजी जिल्हा परिषद सदस्य आत्माराम कोळी, कृषी उत्पन्न बाजार समितीचे संचालक मंदार पाटील, विकास सहकारी सेवा सोसायटीचे चेअरमन सुरेश पाटील, निंभोरा गावचे माजी सरपंच सचिन महाले, शिंगाडी गावचे माजी सरपंच महेंद्र बागडे यांनी भाजप पक्षात प्रवेश केला.

या पक्षप्रवेश सोहळ्यात मंत्री गिरीश महाजन, आमदार अमोल जावळे, रावेर लोकसभा प्रमुख नंदू महाजन, माध्यम विभाग प्रमुख नवनाथ बन यांच्यासह पक्षाचे पदाधिकारी आणि कार्यकर्ते उपस्थित होते. यावेळी भाजप मंत्र्यांनी माजी आमदार अरूण पाटील, तसेच सर्व पदाधिकारी आणि कार्यकर्त्यांचे स्वागत केले. या पक्षप्रवेशामुळे रावेरमध्ये भाजपची ताकद वाढली असल्याचं बोललं जात आहे.