राज्यात मराठी हिंदी भाषेचा वाद सुरु असून नवी मुंबईतील खारघरमध्ये एका परप्रांतीय व्यक्तीने मराठी भाषेबाबत दाखवलेल्या मुजोरपणामुळे वाद चिघळला आहे. स्थानिक नागरिकांच्या आक्रमक भूमिकेमुळे अखेर संबंधित तरुणाला जाहीर माफी मागावी लागली. ‘मराठी बोलना जरूरी है क्या सबको?’ असा सवाल विचारणाऱ्या या तरुणाचा व्हिडिओ सोशल मीडियावर मोठ्या प्रमाणावर व्हायरल झाला असून, त्यावर नागरिकांच्या संतप्त प्रतिक्रिया उमटत आहेत.

नवी मुंबईतील खारघर येथे सुरज यादव नावाचा मुलगा पिठाची गिरणी चालवतो. गेल्या अनेक महिन्यांपासून या दुकानावर हिंदी भाषेतील पाटी लावण्यात आली होती. ज्यामध्ये गिरणीत मिळणाऱ्या सर्व वस्तूंची यादीही हिंदीत लिहिण्यात आली होती. खारघरच्या या भागात मराठी भाषिकांची संख्या जास्त असून स्थानिक नागरिकांनी त्याला मराठी पाटी लावण्याची वारंवार विनंती केली.

मात्र, यादवने याकडे वारंवार दुर्लक्ष केलं आणि उर्मटपणे प्रतिक्रिया देत, “मराठी बोलना जरूरी है क्या सबको?” असं विचारत मराठी भाषेचा अवमान केला. या घटनेचा व्हिडिओ समोर आल्यानंतर नागरिकांमध्ये संतापाची लाट उसळली. याबाबत स्थानिकांनी मनसेच्या शाखेत तक्रार दाखल केल्यानंतर मनसेच्या स्थानिक पदाधिकाऱ्यांनी घटनास्थळी धाव घेत यादवला जाहीर माफी मागायला लावली.

व्हायरल झालेल्या व्हिडीओत हा संपूर्ण प्रकार दाखवण्यात आला असून संबंधित तरुण स्थानिकांच्या प्रश्नांना सरळ उत्तर न देता उर्मटपणे बोलून टाळाटाळ करताना दिसतो आहे. स्थानिकांनी आग्रह केल्यानंतरही यादवने सुरूवातीला उडवाउडवीची उत्तरं दिली, अखेर स्थानिकांकडून आलेले दडपण आणि कार्यकर्त्यांच्या दबावामुळे या तरुणाला माफी मागावी लागली.