पवई आयआयटी मुंबईमधील साहिलच्या आत्महत्येप्रकरणी नवी माहिती समोर आलीय. साहिलचा परीक्षा वर्गातील सीसीटीव्ही व्हिडिओ समोर आलाय. साहिल परीक्षा कक्षात मोबाईल फोन वापरत होता, त्यावेळी त्याला पकडण्यात आले होते. त्यानंतर साहिलने आत्महत्या केली होती. दरम्यान आता या घटनेचे सीसीटीव्ही फुटेज समोर आलाय. सीसीटीव्ही फुटेजमध्ये परीक्षेदरम्यान एक पर्यवेक्षक साहिल वाकोडे याला बाजूला घेऊन जाताना दिसत आहेत.

व्हायरल झालेल्या या व्हिडिओमध्ये,साहिलने काळ्या रंगाचा टी-शर्ट घातलाय. परीक्षा कक्षातील पहिल्या रांगेत तो बसलेला दिसत आहे. त्यावेळी एक पर्यवेक्षक त्याच्याजवळ येतात. त्याच्या शेजारी थांबतात. या दृश्यांमध्ये साहिल काही वेळानंतर जागेवरून उठतो. नंतर पुन्हा बसताना आपला मोबाईल फोन त्या शिक्षकांच्या स्वाधीन करताना दिसत आहे. त्यानंतर त्यांच्यात चर्चा होते आणि मग तो आपल्या वस्तू गोळा करून परीक्षा कक्षातून बाहेर पडताना दिसतोय. दरम्यान त्यानंतर साहिल वसतिगृहातील आपल्या रुमवर गेला. तेथे त्याने गळफास घेत जीवन संपवलं.

परीक्षेदरम्यान साहिल मोबाईल फोन वापरत होता

साहिलच्या मृत्यूबाबत शोक व्यक्त करताना, आयआयटी बॉम्बेने नंतर ही दिली की, परीक्षेदरम्यान त्याला मोबाईल फोन वापरताना पकडण्यात आले होते. प्रश्नांची उत्तरे मिळवण्यासाठी त्याने प्रश्नपत्रिका 'चॅटजीपीटी'वर (ChatGPT) अपलोड केली होती, परंतु त्याच्यावर कोणतीही शिस्तभंगाची कारवाई करण्यात आली नव्हती.

साहिलच्या वडिलांकडून जाती भेदभावचा आरोप

साहिलच्या पालकांनी आरोप केला की, संस्थेत वाकोडेचा छळ केला जात होता. त्याने त्याच्यासोबत भेदभाव केला जात होता. साहिलचे वडील रवींद्र वाकोडे आणि आई सोनाली यांनी प्राध्यापक सूर्यनारायण दूला यांच्या अटकेचीही मागणी केली आहे. दूला यांनी साहिलशी भेदभाव केल्याचा आरोप करण्यात आलाय.