मुंबई महानगर पालिका निवडणुकीपूर्वी प्रशासनात अनेक बदल सुरू झाले आहेत. मुंबई महापालिकेचे अतिरिक्त आयुक्त डॉ. अमित सैनी यांची अखेर बदली करण्यात आली आहे. अमित सैनी यांच्या जागी आएएस अधिकारी अविनाश ढाकणे यांची नियुक्ती करण्यात आली आहे. अविनाश ढाकणे यांनी बदली होताच लगेच डॉ. अमित सैनी यांच्याकडून पदभार स्वीकारावा असे आदेश राज्याचे सह सचिव सुभाष उमराणीकर यांनी दिले आहेत.

मुंबई महापालिकेचे माजी अतिरिक्त आयुक्त डॉ. अमित सैनी यांच्यावर अनेक आरोप करण्यात आले होते. अभियंत्यांच्या बढती आणि बदलीमुळे ते वादात सापडले होते. त्यांनी केलेल्या बदली आणि बढतींना स्थगिती देखील देण्यात आली होती. या स्थगितीनंतर अमित सैनी यांची बदली होणार अशा जोरदार चर्चा सुरू झाल्या होत्या. अखेर त्यांच्या जागी अविनाश ढाकणे यांची वर्णी लागली. सध्या डॉ. अमित सैनी यांची बदली करण्यात आली नसून ते वेटिंगवरच आहेत.

मुंबई महापालिकेत गेल्या ३ वर्षांपासून प्रशासक राज आहे. यामुळेच मुंबई महापालिकेत गोंधळाची स्थिती निर्माण झालेली आहे. बीएमसीमध्ये बदल्या आणि बढत्यांचा गेल्या अनेक वर्षांपासून सावळा गोंधळ सुरु आहे. काही दिवसांपूर्वी मुंबई महापालिका अतिरिक्त आयुक्त पदावर असताना अमित सैनी यांनी १२२ अधिकाऱ्यांच्या आणि ३४ अभियंत्यांच्या बदली केल्या होत्या. तर १०० बदल्या या प्रक्रियेत आहेत. याच्यामुळेच महापालिकेत गोंधळाची स्थिती निर्माण झाली आहे. अभियंत्यांच्या बदलीबाबत अनियमितता झाल्याची बाब लक्षात आल्यानंतर मुख्यमंत्री देवेंद्र फडणवीस यांनी या सर्व बदली आदेशाला स्थगिती देण्याचे निर्देश महापालिका आयुक्तांना दिले.

मुख्यमंत्र्यांच्या आदेशानंतर अमित सैनी यांनी केलेल्या महापालिकेतील १५६ अभियंत्यांच्या बदलीला पालिका आयुक्तांनी स्थगिती दिली. याच प्रकरणावरून अमित सैनी हे वादात अडकले होते. जूनमध्ये त्यांच्यावर हे आरोप करण्यात आले होते. त्यानंतर डिसेंबरमध्ये अमित सैनी यांची बदली करण्यात आली. तेव्हापासून ते वेटिंगवरच आहेत. अद्याप त्यांची बदली झालेली नाही.