सुनील काळे | मुंबई

Mumbai News :

काँग्रेसचे वरिष्ठ नेते आणि माजी मुख्यमंत्री अशोक चव्हाण यांच्या राजीनाम्यानंतर खळबळ उडाली. अशोक चव्हाण यांच्यासोबत काँग्रेसचे काही आमदार देखील जाणार असल्याची चर्चा आहे. त्यामुळे काँग्रेसने आपल्या आमदारांची तातडीची बैठक बोलावली आहे. या बैठकीला अनेक आमदार गैरहजर असल्याची माहिती समोर येत आहे.

काही आमदारांना आपण गैरहजर राहण्याबाबत प्रदेशाध्यक्ष नाना पटोले यांना कळवलं आहे. तर काही काही आमदार नॉट रिचेबल आहेत. काँग्रेसचे ४५ आमदारांपैकी ७ आमदार गैरहजर आहेत.

कोणते आमदार गैरहजर आहेत?

• मोहनराव हंबर्डे हे अशोक चव्हाण समर्थक आहेत. हंबर्डेंच्या घरी लग्नकार्य आहे त्यामुळे ते बैठकील येणार नाहीत अशी माहिती नाना पटोले यांनी दिली.

• माधवराव जवळगेकर हे देखील अशोक चव्हाण समर्थक आहेत. तेही वैयक्तिक कारणामुळे बैठकीला येणार नाहीत, असं नाना पटोले यांनी सांगितलं.

• जितेश अंतापुरकर हेही अशोक चव्हाण समर्थक आहेत. ते देखील आलेले नाहीत.

• अमित देशमुख देशमुख देखील बैठकीला पोहोचले नाहीत.

• केसी पाडवी देखील बैठकीला आलेले नाहीत. ते देखील लग्नकार्यामुळे येणार नसल्याची माहिती आहे.

• संग्राम थोपटे आणि सुलभा खोडके हे देखील वैयक्तिक कारणामुळे बैठकीला येणार नाहीत.

नाना पटोले काय म्हणाले?

काँग्रेस आमदारांबाबत अफवा पसरवल्या जात आहेत. काँग्रेसचं लोणावळा येथे दोन दिवसीय शिबीर आहे. अशातच राज्यसभेची निवडणूक प्रक्रियेचा फॉर्म भरणे आहे. त्यानंतर आम्ही जाणार आहोत. अनुपस्थित राहणाऱ्या आमदारांनी न येण्याबाबतची कारणे आम्हाला कळवली आहेत. मी आणि बाळासाहेब थोरात यांचं सर्वांशी बोलणं झालं आहे, असं नाना पटोले यांनी म्हटलं.