वसई विरार - महाराष्ट्र पोलिस दलातील अनेक पोलिस आपली ड्युटी प्रामाणिकपणे करतात. ड्युटी करत असताना त्यांना अनेक अडचणींना सामोरे जावे लागले. मात्र तरीही ते आपलं कर्तव्य चोख बजावतात. आपली ड्युटी चोखपणे करता यावी यासाठी पोलिस उपनिरिक्षक अमर पाटील यांनी अनोखी शक्कल लढवली आहे. सागरी भागातीत समुद्रकिनाऱ्यावर दुचाकी किंवा चारचाकीने गस्त घालता येत नसल्याने अर्नाळा सागरी पोलिस ठाण्याच्या पोलिसांनी चक्क घोड्यावर बसुन गस्त घालण्यास सुरवात केली आहे. ("GhodeWala police" A unique idea by the police to fulfill their duty)

हे देखील पहा -

सागरी किनारपट्टीवर वाळूची जमीन, दलदलीची जागा आणि कच्चे रस्ते यामुळे पोलिसांना गस्त घालणे शक्य होत नव्हतं. अशा किनारपट्टीवर गस्त घालण्यासाठी अर्नाळा सागरी पोलीस ठाण्याच्या पोलिसांनी चक्क घोड्यावरून गस्त घालायला सुरवात केली आहे. घोड्यावरचा पोलीस हा सध्या विरार अर्नाळा परिसरात आकर्षणाचा केंद्रबिंदू बनला आहे.

घोडेस्वाराकडून महिन्याभराचे प्रशिक्षण घेऊन पोलिसांनी घोड्यावरुन गस्त सुरू केली. त्यामुळे या भागात अमर पाटील यांची “घोडेवाला पोलीस” अशी ओळख बनली आहे. ते पोलीस गणवेशात गस्त घालायला निघाले की लोकंही त्यांच्याकडे कुतूहलाने बघतात, त्यांचे फोटो घेत असतात. त्याचप्रमाणे गस्तीसाठी वापरण्यात येणारे हे घोडे याच भागातील घोडेस्वारांचे असल्याने घोडे सांभाळण्याचा खर्चही पोलिसांना येत नाही. शिवाय या भागातील घोडेस्वारांना पैसेही मिळतात.

सागरी किनाऱ्यावर अनेक पर्यटक येत असतात. अशात काही विकृतांमुळे अघटीत घटना घडण्याची शक्यता असते. शिवाय अनेकजण सागरी किनाऱ्यावर मद्यपान करण्यास येतात, काहीजण आत्महत्या करण्यास येतात, काहीजण पाण्यात पोहायला गेल्यावर दुर्घटना होऊ शकते. तसेच अवैध वाळू उपसा आणि वृक्षतोही समुद्रकिनारी होत असते त्यामुळे हे सर्व गैरप्रकाकार रोखण्यासाठी सागरी भागांमध्ये गस्त घालणे फार गरजेचे आहे.

Edited By - Akshay Baisane