प्राची कुलकर्णी

Pune Bus Fire News : पुण्यातील नवले पुलावरील वाहनाच्या अपघातानंतर आता शहरात बसला आग लागल्याची घटना घडली आहे. पुण्यातील अप्पर डेपो बसस्थानकाजवळ बसला आग लागल्याची घटना घडली आहे. शुक्रवारी दुपारी १२ वाजण्याच्या सुमारास ही घटना घडली. या घटनेमुळे परिसरात एकच खळबळ उडाली. (Latest Marathi News)

पुण्यातील (Pune) अप्पर डेपो डेपो बसस्थानक येथे बसला आग लागल्याची घटना घडली. या बसला आग लागल्याची खबर माहिती होताच गंगाधाम अग्निशमन केंद्र येथून अग्निशमन वाहन रवाना झाले. घटनास्थळी पोहोचताच जवानांनी बसच्या पुढील बाजूस इंजिनच्या ठिकाणी पेट घेतल्याचे निदर्शनास येताच आगीवर पाण्याचा मारा सुरू केली. जवानांच्या अथक परिश्रमानंतर आगीवर नियंत्रण मिळवलं.

नेमकं काय घडलं?

पुण्यातील अप्पर डेपो डेपो बसस्थानक येथे बसच्या केबीनला अचानाक आग लागली. डेपो ते स्वारगेट मार्गाच्या या बसचे बसचालक विश्वास किलजे यांनी प्राथमिक स्तरावर प्रसंगावधान राखला. त्यांनी बसस्थानकावर उपलब्ध असलेले दोन अग्निरोधक उपकरण वापरून आग आटोक्यात आणण्याचा प्रयत्न केला होता. त्यानंतर अग्निशमन दलाचे जवानांनी येऊन आगीवर नियंत्रण मिळवलं.

घटनेवेळी बसमध्ये कोणीही प्रवासी नव्हते. या घटनेत कोणीही जखमी झाले नाही. मात्र, आगीचे नेमके कारण समजू शकले नाही. या कामगिरीत गंगाधाम अग्निशमन केंद्र अग्निशमन अधिकारी सुनिल नाईकनवरे, वाहनचालक निलेश कदम व जवान जितेंद्र कुंभार, आदिनाथ मोहिते यांनी सहभाग घेतला.