गोपाल मोटघरे, साम टीव्ही

पिंपरी चिंचवड: आर्थिक अडचणींना कंटाळून एकाच कुटुंबातील तिघांनी आत्महत्येचा प्रयत्न केल्याची धक्कादायक घटना पिंपरी-चिंचवड शहरातील मोरवाडी परिसरात उघडकीस आली आहे. या दुर्दैवी घटनेत कुटुंबप्रमुखाचा मृत्यू झाला असून, पत्नी आणि १९ वर्षांची मुलगी यांची प्रकृती चिंताजनक आहे. त्यांच्यावर सध्या रुग्णालयात उपचार सुरू आहेत.

पिंपरी-चिंचवड शहरातील मोरवाडी परिसरातील करिष्मा ग्लोरी सोसायटीमध्ये आर्थिक विवंचनेतून एका कुटुंबाने आत्महत्येचा प्रयत्न केल्याची धक्कादायक घटना समोर आली आहे. या घटनेत कुटुंबप्रमुख विनोद पिल्लाई (वय 50) यांचा मृत्यू झाला असून, पत्नी शैलेजा पिल्लाई (वय 45) आणि मुलगी पूर्णिमा पिल्लाई (वय 19) यांच्यावर उपचार सुरू आहेत. तिघेही मूळचे केरळ येथील असून, मोरवाडीतील करिष्मा ग्लोरी सोसायटी, ए/5, रूम क्रमांक 201 येथे भाड्याने राहत होते.

प्राथमिक माहितीनुसार, तिघांनी घरात कोळशाचा धूर करून त्यासोबत काही विषारी औषधाचे सेवन करत आत्महत्येचा प्रयत्न केला. घटनेची माहिती मिळताच त्यांना तातडीने वायसीएम रुग्णालयात दाखल करण्यात आले. मात्र, डॉक्टरांनी विनोद पिल्लाई यांना तपासणीनंतर मृत घोषित केले. पत्नी आणि मुलगी यांच्यावर उपचार सुरू असून त्यांची प्रकृती लक्षात ठेवून वैद्यकीय उपचार सुरू आहेत.

घराची झडती घेतली असता पोलिसांना एक सुसाइड नोट मिळाली आहे. त्यामध्ये आर्थिक अडचणींमुळे हे टोकाचे पाऊल उचलत असल्याचा उल्लेख करण्यात आला आहे. घटनेची माहिती नातेवाईकांना देण्यात आली असून, पुढील तपास संत तुकाराम नगर पोलीस करत आहेत.