जागोजागी बॅनर लागले. लोकांनी फटाके फोडले आणि पठ्यानं थेट पेढेही वाटले. पोलिस झाल्याचं सेलिब्रेशन एकदम दणक्यात केलं. मात्र सेलिब्रेशनचे हे बॅनर पाहून पोलिसांना संशय आला आणि आनंदात मीठाचा खडा पडला.

पुण्यातील धायरीत राहणाऱ्या एका तरुणाचं लग्न गेल्या अनेक वर्षांपासून जमत नव्हतं. कुटुंबीयही चिंतेत होते. अशातच हा तरुण पोलीस भरतीचाही प्रयत्न करत होता. मात्र कमी उंचीमुळे सतत अपयश येतं होतं.आणि लग्नासाठी घरच्यांची तगादा कायम होता. 'मुलगा पोलिस आहे' असे सांगितलं तर चांगले स्थळ येईल आणि आईही आनंदी होईल,म्हणून तरुणानं एक भन्नाट शक्कल लढवली. कुटुंबियांना पुणे पोलीस दलात भरती झाल्याची खोटी बातमी दिली. नातेवाईकांनी आनंदात जागोजागी बॅनर लावले.

मात्र पेट्रोलिंग करणाऱ्या पोलिसांच्या नजरेस हे बॅनर पडले आणि बॅनरमध्ये दिसणाऱ्या तरुणाची उंची कमी असल्याने पोलिसांना संशय आला. त्यांनी चौकशी केली, आणि सगळा बनाव उघड झाला.

खरतर ज्या वर्दीच्या जीवावर हा तरुण लग्नाची स्वप्न पाहत होता. त्याचं वर्दीतील बनावट फोटोमुळे पोलिसांनी आता तरुणावर कायदेशीर कारवाई केलीय. थोडक्यात काय, तर शॉर्टकट मारून मिळवलेलं यश किंवा खोटा रुबाब कधी ना कधी अंगलट येतोच.