मुंबई: राज्यातील मंत्रिमंडळ विस्ताराला दिल्लीतून अद्याप ग्रीन सिग्नल मिळालेला नाही. मंत्रिमंडळाचा विस्तार आता जुलै महिना संपला तरीही अजूनही झालेला नाही त्यामुळे विरोधकांनी हल्लाबोल सुरू केला आहे. मुख्यमंत्री एकनाथ शिंदे (Eknath Shinde)आणि उपमुख्यमंत्री देवेंद्र फडणवीस यांनी ३० जून रोजी शपथ घेतली. मात्र सुमारे महिना उलटला तरी राज्य मंत्रिमंडळाचा विस्तार झालेला नाही.

मात्र मंत्रिमंडळ विस्तार रखडला असतानाही शिंदे गटात मंत्रिपदासाठी जोरदार लॉबिंग सुरू झाले आहे. शिंदे गटाचे आमदार आणि माजी मंत्री अब्दुल सत्तार दिल्लीत पोहोचले आहेत. सत्तार दिल्लीत भाजप नेत्यांची भेट घेणार आहेत. अशा स्थितीत आता मंत्रिपदासाठी जोरदार रस्सीखेच सुरू झाल्याची चर्चा आहे. (Eknath Shinde Latest News)

मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीस यांच्यात कोणाला किती मंत्रीपदे मिळणार याबाबत चर्चा झाली आहे. मात्र अंतिम निर्णय झालेला नाही. ३ ऑगस्टच्या आत शपथविधी सोहळा होणार होईल, अशी माहिती आमदार अब्दुल सत्तार यांनी दिली. मुख्यमंत्री एकनाथ शिंदे यांच्यासोबत आम्ही कोणत्याही अटीसह आलो नाही, मंत्रिपद द्यायचे की नाही हा त्यांचा निर्णय असून ते जो निर्णय घेतील तो योग्यच असेल असंही आमदार सत्तार म्हणाले.

मी आमदारकीचा राजीनामा देण्यासंदर्भात मुख्यमंत्री एकनाथ शिंदे (Eknath Shinde) यांच्याकडे विनंती करणार असल्याचे अब्दुल सत्तार यांनी सांगितले. राजीनामा देणारा मी आमच्या पन्नास आमदारांपैकी पहिला असेन. ३१ जुलै रोजी माझ्या मतदारसंघात महामेळावा आहे, यावेळी मुख्यमंत्र्यांचाही सत्कार करण्यात येणार आहे. यावेळी मी राजीनामा देणार असल्याचे अब्दुल सत्तार यांनी स्पष्ट केले आहे.