माजी मंत्री एकनाथ खडसे आणि मंत्री गिरीश महाजन यांच्यातील राजकीय वाद चिघळलेला असतानाच आता आणखी एक खळबळजनक बाब समोर आली आहे. खडसेंचे जावई डॉ. प्रांजल खेवलकर यांना एका रेव्ह पार्टीत पोलिसांनी रंगेहाथ पकडलं. ही पार्टी पुण्यातील खराडी येथील उच्चभ्रू भागातील एका महागड्या फ्लॅटमध्ये सुरू होती. पोलिसांनी या रेव्ह पार्टीवर छापा टाकत ७ जणांना ताब्यात घेतले आहे. या रेव्ह पार्टीत हुक्का, कोकेन आणि गांजा अशा अंमली पदार्थांचं सेवन केलं जात असल्याची माहिती आहे. दरम्यान, या प्रकणावर आमदार एकनाथ खडसे यांनी प्रतिक्रिया दिली आहे.

एका वृत्तवाहिनीशी बोलताना एकनाथ खडसे म्हणाले, 'यासंदर्भातील माहिती मला पहिल्यांदा मिळत आहे. हे होणारच होतं, हे मला आधीपासून माहित होतं. त्यांना अडकवण्याचा प्रयत्न सुरू आहे', असा गंभीर आरोप एकनाथ खडसे यांनी केला आहे.

दरम्यान त्यांना 'या प्रकरणात राजकीय वास येत आहे का?', असा प्रश्न विचारले असता, त्यांनी नाकारता येत नाही, असं उत्तर दिलं. त्यामुळे यावेळी अनेकांच्या भुवया उंचावल्या. याप्रकरणी खडसे म्हणाले, 'या प्रकरणी स्थानिक पोलीस तपास करणार नाहीत. खरंतर त्यांच्यावर दबाव असू शकतो. जे दोषी असतील, त्यांना शिक्षा झालीच पाहिजे', असं खडसे म्हणाले.

कारवाईसंदर्भात खडसे म्हणाले, 'मला यासंदर्भात अद्याप पूर्ण माहिती मिळालेली नाही. मी स्पष्ट बोलणाऱ्यांपैकी आहे, मला माहिती मिळाल्यानंतर बोलेन. गेल्या काही दिवसांपासून विरोधात बोलत आहेत, त्यांना अडकवण्याचा प्रयत्न सुरू आहे. मी आता कुणाच्याही बाजूला राहणार नाही, यामध्ये षडयंत्र असल्यास समोर यायला हवं', असंही खडसे म्हणाले.