अभिजीत देशमुख, साम टीव्ही

कल्याणमध्ये भीषण अपघात झाल्याची घटना घडली आहे. कल्याणच्या बिर्ला कॉलेज रोडवर भीषण अपघात झाल्याची घटना घडली आहे. मद्यधुंद कारचालकाने रस्त्यावरील ६ ते ७ वाहनांना धडक दिली. या अपघातानंतर रस्त्यावर एकच खळबळ उडाली. या घटनेची माहिती मिळताच पोलीस देखील घटनास्थळी पोहोचले.

मिळालेल्या माहितीनुसार, कल्याणच्या बिर्ला कॉलेज रोडवर कारचा भीषण अपघात झाला आहे. मद्यधुंद कारचालकाचा कारवरील ताबा सुटल्याने भरधाव कारची दोन कारसह चार ते पाच दुचाकीला धडक दिली. या भीषण अपघातात एक जण गंभीर जखमी झाला आहे. अपघातानंतर नागरिकांनी कारचालकाला पकडून चोपलं. त्यानंतर या कारचालकाला पोलिसांच्या ताब्यात दिलं. या अपघातामुळे बिर्ला रोड रस्त्यावर एकच खळबळ उडाल्याचं पाहायला मिळालं.

घटनास्थळी असलेल्या प्रत्यक्षदर्शी अनिश पटेल यांनी सांगितलं की, 'चुकीच्या मार्गावरून गाडी आली. ही गाडी आधी डंपरला धडकली. त्यानंतर एका स्कुटीला धडकली. या कारचालकाने जवळपास ५ वाहनांना उडवलं. कारचालक मद्यधुंद अवस्थेत होता. पोलिसांनी या कारचालकाला ताब्यात घेतलं आहे. या अपघातात एक जण जखमी झाल्याची शक्यता आहे'.

दुसऱ्या व्यक्तीने अपघाताचा थरार सांगितला. 'मद्यधुंद कारचालकाने दुभाजलाका धडक दिली. आम्ही स्वत:ला वाचवण्याचा प्रयत्न केला. मात्र, या कारकाचलकाने आमच्या वाहनांना धडक दिली. या धडकेत माझ्या कारमधील महिला जखमी झाली आहे. तर मलाही किरकोळ दुखापत झाली आहे. आमच्या कारमध्ये एकूण चार जण होते, असे दुसऱ्या कारचालकाने माहिती दिली.