आगामी स्थानिक स्वराज्य संस्थाच्या निवडणुकीसाठी भाजपने जोरदार मोर्चेबांधणी सुरु केली आहे. आगामी मुंबई महापालिकेसाठी देखील भाजपने मोठी फिल्डिंग लावली आहे. या निवडणुकीच्या तोंडावर भाजप नेत्यांनी बैठकांचा सपाटा लावला आहे. तर मुंबईतील विविध भागात भाजप कार्यकर्त्यांनी निवडणुकीची तयारी सुरु केली आहे. या निवडणुकीच्या तोंडावरच भाजपने मुंबईत विजय संकल्प मेळावा आयोजित केला. या मेळाव्यात भाजपने मुख्यमंत्री देवेंद्र फडणवीस यांनी उद्धव ठाकरे यांच्यावर जोरदार निशाणा साधला.

भाजपच्या संकल्प मेळाव्यात महाराष्ट्रातील भाजपच्या प्रमुख नेत्यांसह कार्यकर्त्यांची मोठ्या प्रमाणात हजेरी पाहायला मिळाली. या उपस्थित कार्यकर्त्यांना मुख्यमंत्री देवेंद्र फडणवीस यांनी संबोधित केले. या मेळाव्यात देवेंद्र फडणवीस म्हणाले, 'काही उच्चके रोज सकाळी मोदींना प्रश्न विचारतात. पण अशा उच्चक्यांना मुंबईतील लोकांनी २०२४ साली झालेल्या विधानसभा निवडणुकीत उत्तर दिलं आहे. मुंबई कोणाची, २०१४, २०१९, २०२४ सालच्या विधानसभा निवडणुकीत लोकांनी उत्तर दिलं आहे'.

'मुंबई ही भाजप, महायुतीची आहे. मुंबई ही भाजप, शिवसेना महायुतीची आहे. शिवसेना म्हणजे हिंदूहृदयसम्राट बाळासाहेब ठाकरेंची असून त्याचे प्रमुख एकनाथ शिंदे आहेत. हे उत्तर दिलं. आज बघू शकता. तुम्ही यांची भाषणे बघा. यांच्या भाषणासाठी १०० रुपये द्यायला तयार आहे. त्यांची मागील १० भाषणे काढा. त्यातून विकासावर एक वाक्य दाखवा. मुंबईकरांच्या जीवनात परिवर्तन आणण्यासाठी विकासाच्या व्हिजनचं एक वाक्य दाखवा. त्यानंतर १०० रुपये माझ्याकडून घेऊन जा. ते बोलतच नाही. बोलूही शकत नाही. गिरणगावातील मराठी माणूस हद्दपार कोणी केला, त्याचं उत्तर त्यांच्याकडे नाही, असे फडणवीस म्हणाले.

मेट्रो प्रकल्पावरून फडणवीसांचा हल्लाबोल

मेट्रो प्रकल्पावर बोलताना फडणवीस म्हणाले, 'आज आपण पाहून शकतो, याठिकाणी मेट्रोचं जाळं तयार केलं. १५ वर्षांत ११ किलोमीटर आणि १० वर्षात ३५४ किलोमीटर हा फरक आहे. हे परिवर्तन पाहायला मिळत आहे. पंतप्रधान मोदी हे येत्या ३० तारखेला कफ परेड सुरु होणारी मेट्रो सेवा ही त्यांच्या हस्ते सुरु होणार आहे'.